Ministrja e Infrastrukturës dhe Energjisë, Belinda Balluku priti sot në një takim ministrin e Ekonomisë në Qeverinë e Maqedonisë së Veriut, Kreshnik Bekteshi, me të cilin diskutoi lidhur me bashkëpunimin mes dy vendeve përmes projekteve të përbashkëta.
“Energjia ishte një nga temat kryesore ku shkëmbyem mendime sa i takon mundësive të bashkëpunimit për shkëmbimin e energjisë, duke sjellë në vëmendje faktin se mes dy vende është në proces ndërtimi i linjës së re të interkonjeksionit 400kV”, tha ministrja.
Ajo e njohu homologun me projektet e qeverisë shqiptare sa i takon sektorit të gazit dhe mbi mundësitë e bashkëpunimit në këtë drejtim.
“Projekte infrastrukturore dhe jo vetëm, kanë qenë dhe do të mbeten në fokus të punës së qeverive të dy vendeve për të nxitur më tej shkëmbimet mes dy vendeve duke ndikuar kështu në zhvillimin ekonomik të tyre”, tha ajo.