Gjermania ndërmerr masa ndaj Moskës pas incidentit me dronin e pajisur me eksploziv pranë një avioni ukrainas. Berlini e cilëson ngjarjen si pjesë të operacioneve hibride ruse në Evropë.
Gjermania ka akuzuar Rusinë se qëndron pas një tentative sulmi me dron në aeroportin Leipzig/Halle, duke e cilësuar incidentin si pjesë të modelit të njohur të operacioneve hibride të Moskës në Evropë.
Ministri i Brendshëm gjerman, Alexander Dobrindt, deklaroi të martën se vlerësimi i autoriteteve gjermane për incidentin e 4-5 gushtit “përputhet me modelin e njohur të operacioneve hibride ruse në Evropë”.
Incidenti ndodhi gjatë natës në aeroportin e Leipzig/Halle, ku një dron i pajisur me eksploziv u gjet pranë një avioni transportues të kompanisë ukrainase Antonov Airlines. Policia gjermane përdori një robot për neutralizimin e pajisjes.
Sipas autoriteteve, disa javë më vonë pranë aeroportit u gjet edhe një tjetër dron, në të cilin u konstatuan gjurmë të një substance shpërthyese.
Aeroporti Leipzig/Halle ka një rëndësi të veçantë strategjike. Përveç aktivitetit civil, ai përdoret për transportin e mallrave ushtarake nga ushtria gjermane dhe aleatët e NATO-s dhe shërben si bazë për kompaninë ukrainase Antonov Airlines.
Berlini ndërmerr masa ndaj Moskës
Ministri i Jashtëm gjerman, Johann Wadephul, deklaroi se Gjermania do të ndërmarrë masa ndaj Rusisë, të cilën Berlini e konsideron përgjegjëse për “sulmin hibrid” në Leipzig.
Wadephul njoftoi se konsullata e përgjithshme ruse në Bonn do të mbyllet deri më 18 shtator. Gjermania do të forcojë gjithashtu kontrollet kufitare për shtetasit rusë dhe do të shtojë presionin ndaj flotës së ashtuquajtur “hije” të Rusisë.
Vendimi shënon një përshkallëzim të mëtejshëm të tensioneve mes Berlinit dhe Moskës, në një kohë kur Gjermania mbetet një prej mbështetësve kryesorë evropianë të Ukrainës.
Nga “fuqi të huaja” te akuza direkte ndaj Rusisë
Në fazat e para të hetimit, qeveria gjermane kishte shmangur një akuzë të drejtpërdrejtë ndaj Moskës dhe kishte folur vetëm për përfshirjen e mundshme të “fuqive të huaja”.
Por deklaratat e fundit të zyrtarëve gjermanë tregojnë një ndryshim të qartë të qëndrimit.
Kancelari Friedrich Merz kishte paralajmëruar më 25 gusht se autorët e sulmeve hibride kundër Gjermanisë “do të paguanin” për veprimet e tyre, pa identifikuar në atë moment një shtet përgjegjës.
Tani Berlini e ka lidhur zyrtarisht incidentin në Leipzig me Rusinë.
“Russian House” në Berlin nën vëzhgim
Në kuadër të këtij përshkallëzimi, vëmendja gjermane është përqendruar edhe te aktivitetet ruse në territorin e vendit.
“Russian House of Science and Culture” në Berlin, një ndërtesë shtatëkatëshe e hapur në vitin 1984 në ish-Berlinin Lindor dhe e vendosur pranë ambasadës ruse, është përmendur nga politikanë gjermanë të sigurisë si një objekt me rëndësi të mundshme për aktivitetet e inteligjencës ruse.
Deputeti konservator dhe eksperti i politikave të sigurisë, Roderich Kiesewetter, ka deklaruar për Welt TV se objekti dyshohet se shërben si qendër për veprimtari spiunazhi.
Sipas tij, në ndërtesë jetojnë më shumë se 100 persona, për të cilët, siç pretendon ai, nuk dihet qartë identiteti dhe aktiviteti i tyre. Kiesewetter ka ngritur gjithashtu dyshime mbi konsumin e lartë të energjisë së ndërtesës, duke e lidhur atë me mundësinë e përdorimit të pajisjeve teknike të survejimit.
Lufta hibride në territorin evropian
Akuzat gjermane vijnë në një periudhë kur vendet evropiane kanë raportuar një numër në rritje incidentesh që i konsiderojnë pjesë të luftës hibride ruse: nga spiunazhi dhe sabotazhi deri te ndërhyrjet kibernetike dhe aktivitetet e dyshimta me dronë.
Moska i ka hedhur poshtë në mënyrë të përsëritur akuzat për një fushatë të organizuar sulmesh hibride kundër vendeve evropiane.
Për Gjermaninë, megjithatë, incidenti i Leipzig/Halle ka një peshë të veçantë për shkak të karakterit strategjik të aeroportit dhe lidhjes së tij me transportin ushtarak të NATO-s dhe mbështetjen për Ukrainën.
Nëse hetimet gjermane konfirmojnë përfundimisht përgjegjësinë ruse, incidenti do të përbëjë një tjetër tregues të përshkallëzimit të konfrontimit hibrid mes Rusisë dhe vendeve evropiane, duke e zhvendosur konfliktin gjithnjë e më shumë përtej fushëbetejës ukrainase.
© 2026 Argumentum
