Bullgaria më 21 shtator tha se po dëbonte një shtetas rus dhe dy bjellorusë për kryerjen e “aktiviteteve të drejtuara kundër” sigurisë dhe interesave kombëtare të vendit.
Njoftimi pasoi një deklaratë të ambasadës ruse në Sofje që thoshte se Bullgaria kishte dëbuar kreun e kishës ortodokse ruse në vend, arkimandritin Vasian dhe dy klerikë të tjerë, shkruan Rel.
Agjencia Shtetërore e Bullgarisë për Sigurinë Kombëtare (DANS) tha në deklaratë se të tre kishin punuar për të “ndikuar qëllimisht në proceset sociale dhe politike në Bullgari në favor të interesave gjeopolitike ruse”.
Agjencia nuk përmendi emrin e plotë të shtetasve të dëbuar. Por inicialet e shtetasit rus — N.Z. — përputhen me ato të emrit laik të Arkimandrit Vassian — Nikolai Zmeyev.
Tre personave të dëbuar u është hequr e drejta e qëndrimit dhe është ndaluar hyrja në Bullgari për një periudhë 5-vjeçare.
Ambasadorja ruse në Bullgari Eleonora Mitrofanova i tha agjencisë shtetërore ruse të lajmeve TASS më parë më 21 shtator se tre klerikët u thirrën në zyrën e migracionit dhe u thanë se duhej të largoheshin nga Bullgaria sepse “paraqesin një kërcënim për sigurinë kombëtare të Bullgarisë”.
Në një deklaratë të publikuar në kanalet e saj të mediave sociale, Ambasada Ruse në Sofje dënoi dëbimin e tre klerikëve duke thënë se ishte një “veprim flagrant”.
Më herët në shtator, ligjvënësi bullgar Atanas Atanasov tha se Arkimandriti Vassian ishte “një përfaqësues i inteligjencës ruse me mantel”.
Komentet e Atanasov pasuan raportet se Arkimandriti Vassian, duke përdorur statusin diplomatik, ishte në mesin e tre diplomatëve rusë të dëbuar nga Maqedonia e Veriut fqinje në fillim të këtij muaji.
Më 16 shtator Shkupi tha se urdhëroi dëbimin e tre rusëve pa përmendur emrat e tyre dhe pa specifikuar arsyet.
Në dhjetor 2022, Kisha Ortodokse Ruse në Sofje u përball me protesta kundër vizitës së një përfaqësuesi të lartë të Patriarkanës së Moskës, të ftuar nga Arkimandriti Vassian. Kisha Ortodokse Ruse ka mbështetur pushtimin e paprovokuar të Ukrainës nga Rusia.
Në vitin 2022, Bullgaria, një anëtare e NATO-s dhe Bashkimit Evropian, dëboi 70 staf diplomatik rus në një veprim që tensionoi rëndë marrëdhëniet diplomatike midis dy vendeve, të cilat ishin aleatë të ngushtë gjatë kohës së komunizmit.
/Argumentum.al
