Deklarata përfundimtare e takimit të Astanës në Teheran: Konflikti sirian nuk ka zgjidhje ushtarake

Në deklaratën përfundimtare të takimit të Astanës në Teheran, Irani, Rusia dhe Turqia theksuan se konflikti sirian nuk ka zgjidhje ushtarake. Ata shprehën vendosmërinë e tyre për të vazhduar bashkëpunimin për të luftuar terrorizmin në të gjitha format dhe manifestimet e tij.

Takimi i shtatë i vendeve garantuese të procesit të Astanës, u mbajt nga Teherani me praninë e presidentëve të Iranit, Rusisë dhe Turqisë. Sipas IRNA, në deklaratën e përbashkët të presidentëve të Republikës Islamike të Iranit, Federatës Ruse dhe Republikës së Turqisë në takimin trepalësh të krerëve të procesit të Astanës, thuhet: Të tre vendet (Irani -Rusi-Turqi) kanë një angazhim të palëkundur për sovranitetin, pavarësinë dhe integritetin territorial të Republikës Arabe Siriane dhe njëkohësisht ata dënojnë aktivitetet e grupeve terroriste në rajone të ndryshme të Sirisë. Irani, Rusia dhe Turqia shprehën gjithashtu kundërshtimin e tyre ndaj grabitjes dhe transferimit të paligjshëm të naftës dhe të ardhurave nga shitja e saj, të cilat i përkasin Sirisë.  

Në këtë deklaratë thuhet se liderët e tre vendeve theksuan edhe një herë vendosmërinë e tyre për të vazhduar bashkëpunimin aktual për të shkatërruar përfundimisht të gjitha grupet dhe organizatat terroriste dhe sipas ligjit ndërkombëtar humanitar kërkuan mbrojtjen e civilëve dhe infrastrukturës civile. Irani, Rusia dhe Turqia kanë shprehur shqetësimin e tyre të thellë për kushtet humanitare në Siri dhe të gjitha sanksionet e njëanshme që i janë vendosur këtij vendi dhe që janë në kundërshtim me të drejtën ndërkombëtare dhe Kartën e Kombeve të Bashkuara. Ata gjithashtu shprehën shqetësimin për masat diskriminuese përmes vendosjes së përjashtimeve për fusha të caktuara gjë e cila mund të krijojë idenë e shpërbërjes së këtij vendi duke ndihmuar axhendat separatiste. Udhëheqësit e të tre vendeve, ndërsa deklaruan se refugjatët dhe personat e zhvendosur brenda vendit kanë të drejtën e kthimit dhe të drejtën për të marrë mbështetje, theksuan nevojën për të lehtësuar kthimin e tyre vullnetar dhe të sigurt në vendbanimet e tyre në Siri.

Udhëheqësit e vendeve garantuese të procesit të Astanës gjithashtu dënuan vazhdimin e sulmeve ushtarake të regjimit sionist në Siri, përfshirë sulmet kundër infrastrukturës civile dhe i konsideruan këto sulme shkelje të ligjit ndërkombëtar, të së drejtës ndërkombëtare humanitare dhe integritetit territorial të Sirisë, sulme që kanë intensifikuar tensionet në rajon. Bisedimet e Astanës nisën me iniciativën e Iranit dhe Rusisë dhe me mbështetjen e Turqisë në vitin 2017 me qëllim zgjidhjen e konfliktit në Siri dhe përfundimin e gjashtë viteve të luftës, zhvendosjes dhe shkatërrimit në këtë vend. Raundi i parë i takimit të Astanës ose takimi i paqes siriane u mbajt në Kazakistan në janar 2017 me praninë e Iranit, Rusisë dhe Turqisë./parstoday