E Ngarkuara me Punë e Shteteve të Bashkuara të Amerikës, Nancy VanHorn, ka përgëzuar Kryeprokurorin e Posaçëm të SPAK, Klodjan Braho, si dhe Kreun e Byrosë Kombëtare të Hetimit (BKH), Joni Keta, për marrjen e roleve të tyre të reja drejtuese.
Gjatë deklaratës së saj, VanHorn ritheksoi mbështetjen e fortë dhe të vazhdueshme të Shteteve të Bashkuara për përpjekjet e SPAK në luftën kundër krimit të organizuar dhe trafikut të narkotikëve, duke e cilësuar këtë betejë si një prioritet të përbashkët.
Ajo citoi edhe deklaratën e Sekretarit amerikan Rubio, i cili ka theksuar vendosmërinë e SHBA-së për të luftuar krimin ndërkombëtar:
“Ne do të përballemi me kartelet e drogës kudo që ndodhen dhe kudo që veprojnë kundër interesave të Shteteve të Bashkuara. Detyrimi kryesor i presidentit është të sigurojë interesin kombëtar dhe sigurinë kombëtare të popullit tonë.”
VanHorn nënvizoi se bashkëpunimi mes institucioneve shqiptare të drejtësisë dhe partnerëve amerikanë mbetet kyç, duke theksuar se së bashku palët qëndrojnë të bashkuara në luftën kundër krimit ndërkombëtar.
/Argumentum.al
