Turqia i ka njoftuar vendet aleate se do të refuzojë anëtarësimin në NATO të Suedisë dhe Finlandës, bëri të ditur sot përmes një video në Twitter, Presidenti turk Recep Tayyip Erdogan.
Finlanda dhe Suedia aplikuan zyrtarisht të mërkurën për t’iu bashkuar aleancës së udhëhequr nga Shtetet e Bashkuara, një vendim që u nxit nga sulmi i Rusisë në Ukrainë. Kundërshtimet e Turqisë kanë befasuar vendet e tjera anëtare.
“Do ta vazhdojmë politikën tonë në një mënyrë të vendosur. U kemi thënë aleatëve se do t’i themi jo anëtarësimit në NATO të Finlandës dhe Suedisë”, tha zoti Erdogan gjatë një interviste në orët e vona të së mërkurës.
Presidenti turk tha se Suedia dhe Finlanda strehojnë dhe financojnë “terroristë” dhe i furnizojnë ata edhe me armë, duke përsëritur kështu akuzat e Ankarasë se këto vende mbështesin grupime, që Turqia i konsideron terroriste, më konkretisht grupin militant Partia e Punëtorëve të Kurdistanit (PKK) si dhe partinë YPG të kurdëve të Sirisë, që gjithashtu e konsideron si grupim terrorist me lidhje të ngushta me PKK-në.
“NATO është aleancë sigurie dhe nuk mund të pranojmë terroristë në radhët e saj”, tha zoti Erdogan.
Vete Sekretari i Përgjithshëm i NATO-s, Jens Stoltenberg, duke folur për aplikimin e Suedisë dhe Finlandës për anëtarësim në aleancën ushtarake, deklaroi se shqetësimet e sigurisë të shprehura nga Turqia duhet të merren parasysh, duke shtuar se rruga më e mirë për të gjetur një dakordim është ulja në bisedime, raporton Anadolu Agency (AA).
“Duhet të merren parasysh shqetësimet e sigurisë së të gjithë aleatëve. Besoj se brenda një kohe të shkurtër do të arrijmë një vendim të përbashkët për anëtarësimin e Suedisë dhe Finlandës në NATO”, tha Stoltenberg në një konferencë shtypi pas takimit me kryeministren daneze Mette Frederiksen në Kopenhagë.
Stoltenberg tha se ndonjëherë ka dallime mes 30 aleatëve të NATO-s, por këto mund të kapërcehen duke biseduar.
Ai theksoi se ata janë në kontakt të ngushtë me të gjithë anëtarët e NATO-s dhe me Turqinë në lidhje me anëtarësimin e Suedisë dhe Finlandës.
“Ne po trajtojmë shqetësimet e shprehura nga Turqia. Kur një aleat i rëndësishëm si Turqia ngre shqetësime për sigurinë, e vetmja mënyrë të gjendet gjuhë e përbashkët është ulja në bisedime”, theksoi shefi i NATO-s.
Duke deklaruar se 96 për qind e popullsisë së BE-së do të jetë në NATO nëse të dy vendet anëtarësohen në aleancë, Stoltenberg vuri në dukje se NATO dhe BE-ja janë në bashkëpunim më të ngushtë se kurrë më parë për çështje si Ballkani Perëndimor, Ukraina dhe siguria kibernetike.
“Unë i mirëpres përpjekjet e mbrojtjes të BE-së. Nëse bëhen në drejtimin e duhur, këto do të forcojnë NATO-n dhe BE-në”, theksoi Stoltenberg.
/Argumentum.al
