Vlerësimi u akordua për kontributin në gazetari dhe forcimin e marrëdhënieve kulturore e mediatike mes Shqipërisë dhe Italisë.
Në sallën historike të Protomotekës, në Campidoglio të Romës, u zhvillua ceremonia e dytë e Fairness Magazine Awards 2026, një aktivitet ndërkombëtar që vlerëson personalitete të shquara të medias, kulturës, diplomacisë, sipërmarrjes dhe shoqërisë civile për kontributin e tyre në promovimin e dialogut, meritokracisë dhe bashkëpunimit ndërkombëtar.
Mes 12 personaliteteve të vlerësuara këtë vit ishte edhe gazetari shqiptar Artur Nura, i cili u nderua për kontributin e tij shumëvjeçar në gazetari dhe komunikim.
Juria vlerësoi punën e Nurës si gazetar në Radio Radicale në Romë, si edhe angazhimin e tij si autor dhe moderator i emisionit “Të Gjitha Rrugët Çojnë në Romë” në ABC News Albania. Përmes këtij formati televiziv, ai ka promovuar historinë, kulturën, diplomacinë, ekonominë dhe marrëdhëniet shqiptaro-italiane, duke ndërtuar ura komunikimi mes dy vendeve.
Ceremonia mblodhi përfaqësues të institucioneve, botës akademike, medias, kulturës dhe biznesit, duke konfirmuar profilin ndërkombëtar të Fairness Magazine Awards si një platformë që promovon dialogun ndërkulturor dhe bashkëpunimin mes vendeve.
Vlerësimi i Artur Nurës përfaqëson një tjetër dëshmi të njohjes ndërkombëtare të profesionistëve shqiptarë dhe nënvizon rolin e medias në forcimin e dialogut kulturor, mirëkuptimit mes popujve dhe promovimit të vlerave evropiane.
Fairness Magazine Awards është një iniciativë e revistës Fairness Magazine, e krijuar për të promovuar dialogun ndërkombëtar, meritokracinë dhe shkëmbimin e përvojave mes Italisë dhe Mbretërisë së Bashkuar. Çmimi i akorduar për gazetarin shqiptar i shton kësaj nisme edhe dimensionin shqiptar, duke forcuar lidhjet mes Shqipërisë, Italisë dhe Britanisë së Madhe përmes medias, kulturës dhe diplomacisë publike.
© 2026 Argumentum
