Gjigandi rus energjetik Gazprom konfirmon ndërprerjen e plotë të dërgesave të gazit natyror në Finlandë pasi kompania finlandeze Gasum dështoi të paguante në rubla për furnizimet e mëparshme, tha kompania ruse në një deklaratë të shtunën.
“Gazprom ka ndërprerë furnizimin me gaz për Gasum (Finlandë) për shkak të dështimit të këtij të fundit për të paguar për dërgesat e gazit në rubla”, thuhet në deklaratë. “Në fund të ditës së punës më 20 maj, Gazprom Export nuk mori një pagesë nga Gasum për dërgesat e gazit në prill në përputhje me urdhrin e presidentit [rus]…”
Kompania ruse deklaroi gjithashtu se në vitin 2021 i dërgoi Finlandës 1.49 miliardë metra kub gaz natyror, që përbënte deri në 67% të vëllimit të përgjithshëm të gazit natyror të furnizuar në këtë vend vitin e kaluar.
Kompania shtetërore finlandeze e gazit Gasgrid Finland njoftoi më herët të shtunën se furnizimet me gaz natyror rus në vend janë ndalur.
“Furnizimi me gaz përmes pikës hyrëse të Imatrës është ndalur më 21 maj 2022”, tha kompania finlandeze në një deklaratë.
“Sasia e gazit që i nevojitet tregut finlandez të gazit importohet në sistemin finlandez të gazit përmes pikës hyrëse të Balticconnector në përputhje me nominimet e bëra nga palët e tregut”, thuhet në deklaratë.
Kompania finlandeze Gasum tha në një deklaratë në fillim të kësaj jave se nuk pranoi kërkesën e Gazprom Export për të kaluar në pagesa në rubla dhe rrjedhimisht nuk do të bënte pagesa në rubla ose sipas marrëveshjes së propozuar të pagesave të Gazprom Export.
Gazprom Export i Rusisë njoftoi të premten se Gasum gjithashtu nuk kishte paguar për dërgesat e gazit natyror në prill.
Presidenti rus Vladimir Putin urdhëroi më 23 mars që shtetet jomiqësore duhet të paguajnë për gazin rus në rubla, duke thënë se Moska do të refuzonte të pranonte pagesat në bazë të kontratave të gazit me ato shtete në valuta ‘të komprometuara’, veçanërisht në dollarë dhe euro.
/Argumentum.al
