Më 21 nëntor 2025, Ministri i Financave, z. Petrit Malaj dhe Drejtuesja e Zyrës së KfW-së në Shqipëri, znj. Mara Drochner, nënshkruan marrëveshjet e huave dhe granteve për fazën e dytë të Programit për Performancën dhe Investimet në Sektorin e Ujit (WPIP II) në vlerën e 50 milionë eurove.
Me një vlerë totale prej 145.7 milionë eurosh, WPIP është iniciativa më e madhe financiare e Qeverisë Shqiptare në sektorin e ujit, e mbështetur kjo nga Qeveria Federale Gjermane (përmes KfW-së), nga Bashkimi Evropian dhe Qeveria Zvicerane përmes Sekretariatit të Shtetit për Çështjet Ekonomike (SECO). Ky është një shembull i bashkimit të fondeve nga ekipi i Evropës pasi për këtë projekt janë parashikuar edhe grante shtesë nga BE-ja.
WPIP II synon të sjellë një ndikim sistematik duke siguruar një furnizim me ujë të besueshëm, dhe higjenikisht të sigurt, me tarifa që mbulojnë kostot dhe të pranueshme nga aspekti social, duke përmirësuar performancën financiare të ndërmarrjeve të furnizimit me ujë në nivelin lokal dhe duke forcuar kushtet kornizë në nivelin sektorial. Programi do të kontribuojë në përmirësimin e cilësisë së jetës së gjysmës së popullsisë urbane në Shqipëri si dhe në mbrojtjen e mjedisit duke reduktuar derdhjen e ujërave të ndotur në lumenj dhe dete. Ai mbështet kësisoj përafrimin e Shqipërisë me standartet mjedisore të Bashkimit Evropian, veçanërisht me Kornizën e BE-së për Ujin dhe Direktivat për Trajtimin e Ujërave të ndotur Urban, duke shënuar një hap të rëndësishëm në rrugën e vendit drejt integrimit evropian.
WPIP II do të ngrihet mbi strukturat e WPIP I, aktualisht është duke u implementuar në Elbasan, Fier, Berat, Lezhë, Shkodër dhe Vlorë, bazuar në prioritizimin e Master Plan-it dhe duke ndjekur një qasje të bazuar në performancë. Me këtë investim, në vendet e zbatimit të projektit: Sarandë, Lezhë dhe Shkodër do të ndërmerren masa shtesë investimi bazuar në prioritizimin e master plan-it të ujit dhe kanalizimeve.
Informacione të përgjithshme rreth KfW-së
Në Shqipëri, KfW-ja financon Bashkëpunimin Financiar Gjerman përmes projekteve dhe programeve të ndryshme. KfW ofron mbështetje në formë grantesh dhe kredish koncesionare për investime kyçe dhe shërbime konsulence të lidhura me projektet. Bashkëpunimi Gjerman për Zhvillim me Shqipërinë filloi në vitin 1988. Që atëherë, Qeveria Gjermane ka angazhuar më shumë se 1.6 miliardë euro për projekte dhe programe zhvillimi. Zhvillimi i Qendrueshëm Urban është një fushë prioritare brenda fushëveprimit të Bashkëpunimit Financiar Gjerman me Shqipërinë, me një portofol aktiv prej mbi 380 milionë eurosh.
/Argumentum.al
