Gjyqtarët në Gjykatën Penale Ndërkombëtare në Hagë lëshuan një urdhër arresti për presidentin rus Vladimir Putin për akuzat për krime lufte.
Gjykata tha se ”urdhri ishte lëshuar për përfshirjen e dyshuar të Putinit në dëbimin dhe transferimin e paligjshëm të fëmijëve nga zonat e pushtuara të Ukrainës në Federatën Ruse”.
“Ka arsye të arsyeshme për të besuar se Putini mban përgjegjësi individuale penale për krimet e mësipërme,” tha gjykata në një deklaratë.
Gjykata tha njëkohësisht se kishte lëshuar një urdhër arresti për Maria Alekseyevna Lvova-Belova, Komisionere për të Drejtat e Fëmijëve në Zyrën e Presidentit të Federatës Ruse, duke përmendur të njëjtat akuza.
Rusia nuk e njeh juridiksionin e Gjykatës Ndërkombëtare Penale (ICC) dhe i konsideron vendimet e saj të pavlefshme, u tha gazetarëve të premten zëdhënësi i Kremlinit Dmitry Peskov, duke komentuar lëshimin e një urdhër-arresti nga trupi për presidentin rus Vladimir Putin.
“Ne e konsiderojmë të egër dhe të papranueshëm vetë formulimin e çështjes. Rusia, si dhe disa shtete të tjera, nuk e njohin juridiksionin e kësaj gjykate dhe, rrjedhimisht, çdo vendim i këtij lloji është i pavlefshëm për Rusinë në aspektin ligjor. ”, tha zëdhënësi i Kremlinit.
“Kjo është, në fakt, e vetmja gjë që do t’ju tregoja dhe mund t’ju tregoja për këtë vendim,” shtoi ai.
Peskov nuk e komentoi një pyetje nëse vendimi i gjykatës do të ndikonte në vizitat e Putinit në vendet që njohën juridiksionin e GJNP-së: “Nuk kam asgjë për të shtuar për këtë temë”.
