Editorial
Katër ngjarje të rënda kanë tronditur Shqipërinë (28.10)brenda pak orësh, duke kthyer edhe një herë në qendër të vëmendjes krizën e thellë të sigurisë publike dhe paaftësinë e institucioneve për të mbrojtur jetën e qytetarëve. Nga Shkodra në Berat, tre persona humbën jetën dhe një tjetër mbeti i plagosur, ndërsa shteti, si gjithmonë, hesht.
Katër qytete, katër tragjedi
Shkodër: 38-vjeçari Enea Busukja, punonjës i Tatimeve, mbeti i plagosur rëndë pasi makina e tij shpërtheu nga vendosja e tritolit. Autorët janë ende në kërkim, ndërsa policia flet për “dyshime” dhe “hetime paraprake” – fjalë që tashmë kanë humbur çdo kuptim.
Durrës: Një krim i tmerrshëm brenda familjes, ku 25-vjeçari Marjan Kodheli vrau babanë e tij, Pjetër Kodheli. Policia thotë se autori kishte probleme mendore – një tjetër mënyrë për të justifikuar mungesën e çdo sistemi parandalues për personat me çrregullime psikike.
Tiranë: Në një lokal në zonën e Komunës së Parisit, 34-vjeçari Indrit Ismaillari u vra nga kolegu i tij, kuzhinieri Filip Shehu, pas një konflikti banal për punën. Një tjetër dëshmi se tensionet në vendet e punës po përfundojnë me tragjedi, në mungesë të çdo ndërhyrjeje apo kontrolli institucional.
Berat: Në kalanë e qytetit, 42-vjeçari Keli Hoxha u vra nga Kristo Mema, 63 vjeç, me precedent penal. Autori është ende në arrati.
Sllovenia jep dorëheqje për një viktimë, Shqipëria hesht për tre
Ngjarjet e sotme kriminale, ku tre persona humbën jetën dhe një tjetër mbeti i plagosur, janë jo vetëm tronditëse, por edhe një paralajmërim alarmant për qeverinë dhe institucionet e shtetit shqiptar. Në vend që të ketë një reagim të menjëhershëm dhe masa të qarta për të parandaluar dhunën, shoqëria shqiptare ndodhet në një krizë të thellë sigurie dhe besimi tek institucionet.
Në çdo vend normal, ngjarje të tilla do të shkaktonin tronditje politike, reagime të menjëhershme dhe ndoshta dorëheqje. Vetëm dy ditë më parë, në Slloveni, një ngjarje me një të vrarë dhe një të plagosur solli dorëheqjen e dy ministrave, akt moral që dëshmon përgjegjësi institucionale.
Në Shqipëri, me tre të vdekur e një të plagosur në katër qytete, asnjë reagim serioz, asnjë reflektim. Ministria e Brendshme hesht, qeveria flet për “suksese” ndërsa qytetarët numërojnë viktimat.
Këto nuk janë ngjarje të rastësishme që lindin vetëm si pasojë e krimit. Ato janë produkt i një shoqërie të frustruar, të lodhur dhe të pambrojtur, ku qytetari i zakonshëm ndjehet i ekspozuar ndaj dhunës së paparashikueshme. Kur personi me probleme mendore mund të vrasi babain e tij, kur një konflikt mes punonjësve përfundon me vrasje, dhe kur një vizitor humb jetën në një qytet historik, kjo tregon boshllëkun e madh të shtetit në parandalimin dhe kontrollin e dhunës.
Qeveria Rama 4 dhe institucionet duhet të reagojnë menjëherë. Nuk mund të presim që tragjeditë të ndodhin për të ndërgjegjësuar ata që kanë përgjegjësi. Duhet një mobilizim i menjëhershëm, masa për parandalimin e krimeve, kontrolle strikte mbi armët dhe lëndët plasëse, mbështetje reale për personat me probleme mendore dhe reforma thelbësore në sistemin e sigurisë. Vetëm një reagim i tillë do të tregojë se shteti dhe qeveria nuk janë spektatore, por aktorë të përgjegjshëm për jetën dhe sigurinë e qytetarëve.
Në mungesë të veprimeve konkrete, shoqëria shqiptare do të vazhdojë të jetojë në frikë dhe pasiguri, ndërsa dhuna e paprecedentë po bëhet pjesë e përditshmërisë. Tre viktimat dhe një i plagosur sot nuk janë vetëm statistika, por një thirrje e fortë për veprim urgjent dhe përgjegjësi të pakushtëzuar nga ata që kanë detyrë të mbrojnë qytetarin.
Shqipëria nuk mund të ecë përpara mbi themele të frikës. Është koha që shteti të zgjohet.
/Argumentum.al
