Kina kritikon SHBA-në për shtrembërimin e fakteve mbi rajonin e Tajvanit

Ministria e Jashtme kineze të martën kritikoi Shtetet e Bashkuara për shtrembërimin e fakteve mbi rajonin e Tajvanit, duke i kërkuar që të respektojë angazhimin e saj ndaj parimit të një Kine.

Raportohet se Departamenti i Shtetit i SHBA-së fshiu formulimet se “Tajvani është pjesë e Kinës” dhe se “SHBA nuk e mbështesin pavarësinë e Tajvanit” në një version të përditësuar të një dokumenti në faqen e tij të internetit më 5 maj.

Zëdhënësi i Ministrisë së Jashtme kineze Zhao Lijian tha në një konferencë të rregullt për shtyp në Pekin se truku i fundit nga pala amerikane synon të zbrazë parimin e një Kine.

Akte të tilla të manipulimit politik që tentojnë të ndryshojnë status quo-në në ngushticat e Tajvanit do t’i djegin ata që luajnë me zjarrin, tha Zhao.

“Historia nuk mund të falsifikohet. Faktet nuk mund të mohohen. Dhe e drejta dhe e gabuara nuk mund të shtrembërohen,” tha ai.

Në konferencë, zëdhënësi përsëriti gjithashtu se ekziston vetëm një Kinë në botë, se rajoni i Tajvanit është pjesë e patjetërsueshme e territorit kinez dhe se qeveria e Republikës Popullore të Kinës është e vetmja qeveri ligjore që përfaqëson të gjithë Kinë.

“Ky është një konsensus dërrmues i komunitetit ndërkombëtar dhe një normë e njohur gjerësisht që rregullon marrëdhëniet ndërkombëtare,” tha Zhao.

Gjatë një takimi virtual me presidentin kinez Xi Jinping në nëntor, presidenti i SHBA Joe Biden ripohoi se SHBA nuk e mbështesin “pavarësinë e Tajvanit”.

Pala amerikane duhet të ndjekë me veprim vërejtjet e presidentit dhe të ndalojë së kërkuari të përdorë Tajvanin për të kontrolluar Kinën, tha zëdhënësi kinez.

/Argumentum.al