Komisioni Evropian ka dënuar aktet e dhunës gjatë protestave në Tiranë dhe qytete të tjera të Shqipërisë, duke kërkuar që përgjegjësit të mbajnë përgjegjësi përmes procedurave ligjore dhe që shqetësimet të adresohen përmes dialogut paqësor.
Në një deklaratë mbi protestat në Shqipëri, Komisioni Evropian dënon zjarrvënien, sulmet ndaj institucioneve shtetërore dhe shkatërrimin e pronës publike dhe private.
“Dhuna nuk ka vend në një shoqëri demokratike”, thekson Komisioni Evropian, duke nënvizuar se reagimi ndaj saj duhet të jetë gjithmonë në përputhje me ligjin dhe proporcional.
Brukseli rikujton se liria e tubimit dhe e shprehjes janë të drejta themelore dhe vlera thelbësore evropiane, të cilat duhet të respektohen dhe të ushtrohen në mënyrë paqësore.
Deklaratë e Komisionit Evropian mbi protestat në Shqipëri:
Dënojmë përdorimin e dhunës në Tiranë dhe qytete të tjera të Shqipërisë, përfshirë zjarrvënien, sulmet ndaj institucioneve shtetërore dhe shkatërrimin e pronës publike dhe private. Dhuna nuk ka vend në një shoqëri demokratike dhe reagimi ndaj saj duhet të jetë gjithmonë në përputhje me ligjin dhe proporcional. Përgjegjësit duhet të mbajnë përgjegjësi nëpërmjet procedurave të rregullta ligjore. Liria e tubimit dhe e shprehjes janë të drejta themelore dhe vlera thelbësore evropiane, të cilat duhen respektuar dhe ushtruar në mënyrë paqësore. Mirëpresim angazhimin e autoriteteve shqiptare për të garantuar të drejtën e protestës. Në një vend kandidat, i angazhuar me vendosmëri në procesin e anëtarësimit në BE dhe që po shënon përparim të rëndësishëm në rrugën e tij evropiane, shqetësimet duhet të adresohen përmes dialogut konstruktiv dhe në mënyrë paqësore.
© 2026 Argumentum
