Manipulimi i informacionit dhe ndërhyrja e huaj përmes fushatave të koordinuara të dezinformimit përbëjnë një nga sfidat më serioze për demokracitë moderne. Ky ishte mesazhi kryesor i Ministrit për Evropën dhe Punët e Jashtme, Ferit Hoxha, gjatë hapjes së Konferencës për Përballjen me Manipulimin e Informacionit dhe Ndërhyrjen e Huaj (FIMI), ku ai theksoi se mbrojtja e hapësirës së informacionit është tashmë pjesë e sigurisë kombëtare dhe e mbrojtjes së demokracisë.
Në fjalën e tij, Hoxha nënvizoi se transformimi i mjedisit global të informacionit ka ndryshuar mënyrën se si zhvillohen përballjet politike dhe gjeopolitike. Sipas tij, demokracia nuk mbrohet më vetëm në kufijtë fizikë apo në debatin publik tradicional, por gjithnjë e më shumë në hapësirën dixhitale, ku zhvillohen betejat për besimin e qytetarëve dhe integritetin e proceseve demokratike.
“Informacioni ka qenë gjithmonë një e mirë publike, por sot ai është shndërruar në një terren strategjik ku vihet në provë besimi, formohen zgjedhjet demokratike dhe ushtrohet ndikimi,” deklaroi ministri.
FIMI si instrument i presionit hibrid
Hoxha paralajmëroi se Manipulimi dhe Ndërhyrja e Informacionit të Huaj (FIMI) nuk duhet parë thjesht si një garë mes narrativave të ndryshme, por si një instrument i mirëorganizuar i luftës hibride.
Sipas tij, këto fushata synojnë të gërryejnë besimin tek institucionet, të shfrytëzojnë ndarjet shoqërore, të përdorin algoritmet si armë për përhapjen e dezinformatave dhe të krijojnë konfuzion mbi vetë realitetin.
“Objektivi nuk është gjithmonë t’i bindë qytetarët për një narrativë të caktuar. Më shpesh synohet të krijohet dyshim ndaj gjithçkaje, të minohet besimi në institucionet publike, në median e pavarur dhe në vetë demokracinë,” u shpreh ai.
Ministri theksoi se zhvillimi i shpejtë i inteligjencës artificiale dhe dominimi i mediave sociale kanë krijuar një mjedis ku asnjë shtet nuk është imun ndaj manipulimit të informacionit.
Ai vlerësoi se këto zhvillime kërkojnë politika të reja dhe bashkëpunim më të ngushtë ndërkombëtar për të garantuar rezistencën e shoqërive demokratike ndaj kërcënimeve të reja.
Shqipëria më e ekspozuar gjatë procesit të integrimit në BE
Një pjesë e rëndësishme e fjalës së Hoxhës iu kushtua situatës së Shqipërisë, duke theksuar se vendi ndodhet në një moment të ndjeshëm për shkak të fazës së avancuar të negociatave për anëtarësim në Bashkimin Evropian.
Sipas tij, ekziston një lidhje e drejtpërdrejtë mes afrimit të Shqipërisë me Bashkimin Evropian dhe rritjes së ekspozimit ndaj ndikimeve armiqësore nga aktorë që kundërshtojnë orientimin strategjik euroatlantik të vendit.
“Ndërsa hyjmë në fazën përfundimtare të negociatave me Bashkimin Evropian, jemi gjithnjë e më të ekspozuar ndaj manipulimit dhe ndikimit armiqësor nga ata që nuk ndajnë zgjedhjet tona strategjike dhe vlerat tona demokratike,” deklaroi ministri.
Rezistenca ndërtohet përmes bashkëpunimit
Hoxha theksoi se mbrojtja nga manipulimi i informacionit nuk mund të mbështetet vetëm tek institucionet shtetërore dhe as të delegohet tek partnerët ndërkombëtarë.
Ai bëri thirrje për një qasje gjithëpërfshirëse që përfshin qeverinë, parlamentin, median e pavarur, shoqërinë civile, komunitetin akademik, ekspertët e teknologjisë dhe qytetarët.
Po ashtu, ministri vlerësoi rëndësinë e bashkëpunimit me vendet aleate që kanë përvojë në identifikimin dhe luftimin e këtyre kërcënimeve.
“Bashkëpunimi ndërkombëtar është thelbësor. Përvoja e vendeve që janë përballur drejtpërdrejt me këto sulme duhet të bëhet pjesë e një përgjigjeje të përbashkët për të gjithë aleatët,” tha ai.
Sipas Hoxhës, qëllimi i konferencës nuk është vetëm evidentimi i problemit të manipulimit të informacionit, por shkëmbimi i përvojave dhe identifikimi i mekanizmave praktikë për forcimin e rezistencës ndaj këtyre kërcënimeve.
Ai theksoi se mbrojtja e lirisë së shprehjes duhet të ecë paralelisht me mbrojtjen e së vërtetës dhe të institucioneve demokratike.
“Në Shqipëri e dimë mirë çmimin e lirisë, sepse kemi përjetuar mungesën e saj. Prandaj nuk do të kursejmë asgjë për të mbrojtur vlerat demokratike të fituara me mund,” u shpreh ministri.
Në përfundim të fjalës së tij, Hoxha theksoi se ndërtimi i qëndrueshmërisë ndaj manipulimit të informacionit kërkon vizion politik, ndërgjegjësim publik, vendosmëri dhe lidership. Ai nënvizoi se mbrojtja e hapësirës së informacionit është thelbësore për garantimin e një mjedisi ku qytetarët mund të formojnë mendime të lira, të marrin vendime të informuara dhe të ushtrojnë të drejtat e tyre demokratike, duke e cilësuar këtë si një nga sfidat më të mëdha me të cilat përballen sot demokracitë evropiane.
© 2026 Argumentum
