Arrihet marrëveshja për zbatimin e marëvehshjes për energjinë mes Kosovës dhe Serbisë, e cila është nënshkruar në vitin 2013, por nuk kishte gjetur zbatim.

Lajmin e ka dhënë emisari i BE-së për dialogun Kosovë-Serbi, Miroslav Lajcak, i cili ka njoftuar se Kosova dhe Serbia janë pajtuar për miratimin e udhërrëfyesit për zbatimin e Marrëveshjeve për Energjinë në kuadër të dialogut të Brukselit.

“Me kënaqësi të njoftoj se Kosova dhe Serbia sapo miratuan Udhërrëfyesin për Zbatimin e Marrëveshjeve të Energjisë në kuadër të Dialogut të lehtësuar nga BE-ja. Ky është një hap i madh përpara”, njofton Miroslav Lajçak.

Në këtë takim ishin të pranishëm  zëvendëskryeministri i Kosovës, Besnik Bislimi edhe shefi i delegacionit të Serbisë, Petar Petkoviç.

Përmes kësaj marrëveshje të arritur, qytetarët në katër komunat në veri të Kosovës,të banuara më shumicë serbe, që nuk kanë paguar drita nga 1999, detyrohen të paguajnë faturat.

Reagimet

Përfaqësuesi i Lartë i BE-së për Politikë të Jashtme e Siguri, Josep Borrell, ka përshëndetur marrëveshjen për energjinë, të arritur sot mes Kosovës e Serbisë në Bruksel.

Me një deklarim të shkurtër në Twitter, Borrell tha se ka biseduar edhe me kryeministrin e Kosovës, Albin Kurti dhe presidentin e Serbisë, Aleksandar Vuçiq, të cilit edhe i ka uruar për marrëveshjen e arritur.

“Ky është një hap i madh dhe i rëndësishëm përpara në procesin e dialogut të lehtësuar nga BE e që  do të japë rezultate konkrete për të gjithë qytetarët”,shkruan Borrell.

“Presim të vazhdojmë punën në hapat e tjerë”.

I dërguari i Posaçëm i BE-së për Dialogun, Mirolslav Lajçak, përmes një postimi në Twitter, ka njoftuar Kosova dhe Serbia kanë miratuar Udhërrëfyesin e zbatimit të marrëveshjeve për energjinë, në kuadër të dialogut të lehtësuar nga BE-ja.

Marrëveshjen e arritur e kanë përshëndetur me tone të ndryshme, edhe zyrtarë të ndryshëm të Kosovës, Serbisë dhe ndërkombëtarë.

Haradinaj: Marrëveshja për energjinë nuk e cenon sovranitetin

Kreu i AAK-së, Ramush Haradinaj ka folur haptas për qëndrimin e tij në lidhje me marrëveshjen e Serbisë për energjinë.

Haradinaj shkruan se, kjo marrëveshje nuk prek sovranitetin energjetik të Kosovës meqë ai është vendosur me Marrëveshjen e re të kyçjes KOST-ENTSO-E.

Ai përshkruan nëntë pikat e “Roadmap” ku sipas tij, nëse pala serbe e zbaton nuk është keq në krahasim me gjendjen e tanishme.

“Nëse pala serbe e zbaton këtë “roadmap”, nuk është keq në krahasim me gjendjen e tanishme. Pra e tëra, siç po thuhet në këtë marrëveshje bazohet në marrëveshjet e mëparshme për energjinë të viteve 2013/2015, veçse këtu janë vënë edhe afatet kohore”, shkruan Haradinaj.

BE mirëpret marrëveshjen për energjinë

Shërbimi diplomatik i BE-së, ka lëshuar një komunikatë për media lidhur me pajtimin e palëve për Udhërrëfyesin për Zbatimin e Marrëveshjes për Energjinë.

 BE-ja ka përgëzuar kryenegociatorët Bislimi dhe Petkoviq teksa deklaron se me marrëveshjen e sotme, kompania ‘Elektrosever’ me pronësi të Serbisë do të furnizojë katër komunat veriore me rrymë bazuar në ligjet e Kosovës.

“Me marrëveshjen e sotme, Elektrosever, një kompani me pronësi të Serbisë e vendosur në Kosovë dhe sipas ligjit të Kosovës, do të fillojë furnizimin me energji elektrike për konsumatorët në katër komunat veriore me shumicë serbe. Kjo hap rrugën drejt përfundimit të praktikës aktuale jotransparente dhe të parregulluar”, thuhet në komunikatë.

Pas marrëveshjes për energjinë, lavdërohet Petkoviq

Kryenegociatori i Serbisë, Petar Petkoviq, tha se Prishtina ka refuzuar të flasë për energjetikën dhe se Beogradi e ka “detyruar” atë jo vetëm të flasë, por edhe të pajtohet për këtë çështje.

Udhërrëfyesi, sipas tij, përfshin një sërë hapash, afatesh dhe përgjegjësish për të dyja palët.

Sipas tij, të gjitha afatet nisin nga momenti kur Elektrosever merr licencën për furnizim.

“Elektrosever do të kryejë edhe shërbime të rëndësishme të shpërndarjes – ajo që kemi kërkuar dhe në të cilën kemi insistuar. Elektrosever do të kryejë shërbime të shpërndarjes, si: faturim, pagesa, mirëmbajtje e rrjetit dhe lidhje fizike e konsumatorëve. Kjo është shumë e rëndësishme, sepse do të thotë se kemi autonomi në furnizimin e veriut të ‘Kosovës dhe Metohisë’ me energji elektrike”, tha Petkoviq.

Ai tha se pas kësaj marrëveshjeje është hapur rruga edhe për bisedime për formimin e Asociacionit të komunave me shumicë serbe në Kosovë.

Lista Serbe flet për shmangie “pushtimi”

Lista Serbe e ka mirëpritur Marrëveshjen e arritur të martën në Bruksel mes Kosovës e Serbisë për faturimin e energjisë në veri. Nëpërmjet një reagimi në Facebook, Lista shkruan se Marrëveshja e arritur është dëshmi se “dialogu është mënyra e vetme për zgjidhjen e çështjeve të hapura”.

“Kjo (Marrëveshja v.j.) parandaloi mundësinë e pushtimit brutal të (trafostacionit v.j.) në Valaç, sistemeve tona energjetike dhe rrezikimin e furnizimit me energji. Populli serb asnjëherë nuk ka ikur nga përgjegjësitë e tij, por ne kemi kërkuar që kjo të bëhet në përputhje me marrëveshjen, përkatësisht të bëhet nga Elektrosever, që është simotër e EPS-it (Elektro Provreda Srbije)”, thuhet në njoftimin.

Çitaku: Marrëveshjen e sotme për energji atëbotë e konsideronte tradhti kombëtare

Nënkryetarja e PDK-së, Vlora Çitaku, ka thënë se marrëveshjen e nënshkruan nga pozita sot, kryeministri Albin Kurti atëbotë e konsideronte tradhti kombëtare.

“Pa i hequr asnjë pikë e asnjë presje, Kryeministri Kurti qenka dakorduar për planin e zbatimit të marrëveshjes për energji të dakorduar në Bruksel me 2015.

 Po të njëjtën marrëveshje, kryeministri atëbotë e konsideronte tradhti kombëtare. E vetmja gjë konsistonte tek Kurti është mungesa e konsistencës. Kryeministri ua ka borxh votuesve të tij një sqarim, a e ka pas gabim atëherë, apo e ka gabim tash?

Kryeministri është shndërruar në noter të marrëveshjeve paraprake, duke e kthyer procesin mbrapa, e duke humbur kohë”, ka shkruar Çitaku.

Kusari-Lila: Po kthehet normaliteti në çdo cep të vendit

Shefja e Grupit Parlamentar të Vetëvendosjes, Mimoza Kusari – Lila, është deklaruar pas arritjes së marrëveshjes për faturimin e energjisë në veri, sot mes Kosovës dhe Serbisë.

“Lajme optimiste nga Brukseli për zbatimin e marrëveshjes për energjinë! Përfundimisht normalitet në sistemin e faturimit në gjithë territorin e Republikës së Kosovës pa përjashtim për katër komunat në veri. Një prej sfidave më të rënda për sistemin elektro-energjetik të Kosovës që nga përfundimi i luftës, po i vjen fundi. Normaliteti po kthehet në çdo cep të vendit pa përjashtim!”, shkruan ajo. Kosova dhe Serbia kanë miratuar udhërrëfyesin për zbatimin e marrëveshjes për energjinë elektrike në veri.

Franca mirëpret marrëveshjen për energjinë

Ambasada e Francës në Kosovë e ka mirëpritur arritjen e marrëveshjes për udhërrëfyesin për energjinë në mes Kosovës dhe Serbisë.

“Franca mirëpret miratimin e udhërrëfyesit në Bruksel, dokument që paraqet progresin konkret dhe domethënës në dialog”, thuhet në qëndrimin e kësaj ambasade. Po ashtu u theksua se tash e tutje bëhet fjalë për sigurimin e zbatimit të plotë të tij.

Mustafa: Tash LVV të gjuajë vetën me gurë, pas arritjes së marrëveshjes

Ish-kryeministri i Kosovës, Isa Mustafa ka komentuar marrëveshjet  e Qeverisë Kurti si atë për targat si dhe marrëveshjen që sot u arritë për energjinë.

“Përveç se VV po i negocion marrëveshjet që i kemi arritur më parë, si atë për tabelat dhe këtë për energjinë, s’mund ta komentoj këtë të fundit, sepse ata nuk po e tregojnë përmbajtjen e saj. Tani u mbetet ta gjuajnë veten me gurë, gaz e molotov…!”, deklaroi ish-kreu i Qeverisë Mustafa.

Kosova dhe Serbia kanë arritur ta nënshkruajë Udhërrëfyesin për Zbatimin e Marrëveshjeve të Energjisë në kuadër të dialogut Kosovë-Serbi.

Kurti: I erdhi fundi padrejtësisë për pagesën e energjisë

(E plotësuar) Kryeministri i Republikës së Kosovës, Albin Kurti e ka quajtur lajm të mirë miratimin e udhërrëfyesit për zbatimin e marrëveshjes për energjinë elektrike në veri.

Shefi i ekzekutivit kosovar u shpreh se ky dakordim i jap rrugë zbatimit të këtij udhërrëfyesi i cili mundëson inkasimin e energjisë elektrike të shpenzuar në komunat veriore.

“Është lajm i mirë që është arritur dakordimi pas bisedimeve të gjata e takimeve të shumta, kjo është rezultat i punës tonë të palodhshme dhe i qëndrimeve tona parimore. Në bazë të ligjit dhe kushtetutshmërisë së Republikës së Kosovës në bazë të rregullave tona ka ndodhur dakordimi më në fund për zbatimin e udhërrëfyesit që do të mundësojë inkasimin e energjisë elektrike të konsumuar edhe në veri të lumit Iber, në komunat atje. Ka qenë një dëmtim i madh i buxhetit, një padrejtësi e jashtëzakonshme që na është bërë në këto vite andaj me këtë dakordim po i vjen fundi dhe po mundësohet që për energjinë e konsumuar edhe të paguhet ajo energji nga të gjithë qytetarët, ashtu që të gjithë të jemi të barabartë dhe të mos dëmtohet buxheti”, theksoi ai.

Këto komente Kurti i ka bërë pas tryezës së organizuar nga Institucioni i Avokatit të Popullit, me temën “E drejta për gjykim në kohë të arsyeshme”.

Kurti tha se detajet e kësaj marrëveshje do t’i shpalosë kryenegociatori për dialogun me Serbinë, Besnik Bislimi.

“Ka disa elemente brenda kësaj marrëveshje të cilat mendoj që më së miri është t’i shpalos vetë zëvendëskryeministri, Besnik Bislimi i cili do ta bëjë këtë me tu kthyer në Kosovë mbase edhe pa u kthyer”, u shpreh Kurti.

I pyetur se udhërrëfyesi i sotëm është për një marrëveshje që si Lëvizje Vetëvendosje e kanë kundërshtuar, shefi i qeverisë, Albin Kurti tha se kanë trashëguar gjëra që nuk kanë dashur, por po mundohen ta bëjnë më të mirën.

“Ne po e mundësojmë inkasimin, kemi trashëguar shumë gjëra që nuk i kemi dashur, por e kemi bërë më të mirën që mundemi e dimë në rrethanat që kemi”, deklaroi Kurti.

Kryeministri i Kosovës, Albin Kurti deklaroi se nga kryetari i Kuvendit të Kosovës, Glauk Konjufca është njoftuat edhe për takimet që ka zhvilluar ky i fundit me të paraburgosurit në Hagë.

“Ai më tregoi që ka diskutuar me të gjithë ata që po mbahen në Hagë për shkak se si kryetar i Kuvendit të Republikës ai e udhëheq institucionin që në fakt është bërë amendamentimi i Kushtetutës në vitin 2015 që i ka hapur rrugë asaj që e quajmë Gjykatë Speciale dhe e ka konsideruar si përgjegjësi të tij që t’i dëgjoj ata të cilët po mbahen në paraburgim e mbase do të dëgjojë dhe të tjerë për shkak se si drejtues i organet më të lartë përfaqësues e ligjvënës në Republikën tonë e ka konsideruar përgjegjësi dhe me siguri që i takon kryetarit, Konjufca se çfarë idesh mund të kemi për rrugën përpara në mënyrë që të rritet transparenca”, theksoi ai.

Miratimi i udhërrëfyesit për zbatimin e marrëveshjes për energjinë elektrike në veri sot është bërë në mes të zëvendëskryeministrit të Kosovës, Besnik Bislmi dhe shefi i delegacionit serb, Petar Petkoviq. Marrëveshja për energjinë në mes të Kosovës dhe Serbisë ishte arritur në vitin 2013 dhe konfirmuar më 2015.

Kurti reagon pas ujdisë për zbatimin e marrëveshjes së energjisë me Serbinë

Pasi Kosova dhe Serbia sot kanë miratuar udhërrëfyesin për zbatimin e marrëveshjes për energjinë elektrike në veri kryeministri i Kosovës, Albin Kurti këtë dakordim e ka quajtur lajm të mirë.

“Ky është rezultat i punës tonë të palodhshme dhe i qëndrimeve tona parimore në bazë të ligjit dhe kushtetutshmërisë së Kosovës, në bazë të rregullave tona ka ndodhur dakordimi më në fund për zbatim të udhërrëfyesit që do të mundësojë inkasimin e energjisë së shpenzuar në veri të lumit Iber”, tha Kurti. 

Lidhur me atë se kur pritet të nis inksasimi i energjisë së shpenzuar, Kurti tha se këto detaje do ti jap zëvendëskryeministri Besnik Bislimi pasi të kthehet./RTK-Argumentum.al