Komisioni Qendror Zgjedhor ka miratuar planin operacional për ditën e zgjedhjeve të 9 shkurtit si dhe votimin e nesërm të votuesve nga jashtë në përfaqësitë diplomatike.
Qendra e parë diplomatike që do të hapet për votim të mërgatës më 8 shkurt do të jetë në Ankara, ndërsa ato të fundit që do të mbyllen janë në SHBA dhe Kanada.
Në kuadër të këtij plani operacional janë parashikuar edhe intervalet kohore kur do të bëhet raportimi i daljes së votuesve dhe rezultatet preliminare.
Kryetari i KQZ-së, Kreshnik Radoniçi u bëri thirrje qytetarëve të diasporës që janë regjistruar suksesshëm për të marrë pjesë në zgjedhje, që të votojnë “duke respektuar rendin e shtëpisë në shtetet ku organizohet votimi”.
“Është hera e parë për KQZ-në që e organizojmë votimin për konsullata dhe ambasada. Ftoj qytetarët që janë regjistruar suksesshëm për të votuar të dalin në votim dhe të respektojnë rendin e shtëpisë në shtetet që organizohet votimi. Uroj për një proces të qetë dhe duke falënderuar stafin e MPJD-së uroj për votim të suksesshëm dhe proces të rregullt dhe demokratik”, tha ai.
Ndërkaq, anëtari i Këshillit për Operacione Zgjedhore në KQZ, Arianit Elshani, bëri të ditura detajet e votimit për zgjedhjet e 9 shkurtit si dhe për votimin e mërgatës me 8 shkurt.
“Në kuadër të këtij plani operacional janë parashikuar edhe aktet që do të jenë të përfshirë në dhomën operative të KQZ-së. Bëhet fjalë për prokurorinë dhe policinë e Kosovës, linjat telefonike që do të jenë të hapura për të raportuar dhe marrë ndonjë informacion nga KQZ-ja në ditën e zgjedhjeve. Po ashtu janë ndarë edhe ekipet që do të merren me çështje protokollare, komunikimin dhe informimit. Njëherë janë përcaktuar edhe intervalet kohore se kur do të bëhet raportimi i daljes së votueseve. Raportimi për pjesëmarrjen në zgjedhje do të bëhet në tre terminë”, tha ai.
Në anën tjetër, kryetari i KQZ-së, Kreshnik Radoniçi, pas insistimit të mediave, foli edhe për raportimet se ambasadori i Kosovës në Kroaci, Martin Berishaj, ka zarfet me fletëvotime dhe i ka dërguar në ambasadë në Kroaci.
Ai tha se zyrtarisht ende nuk dinë asgjë dhe se ato pretendime mbetet të vërtetohen.
“Zyrtarisht ende nuk dijmë asgjë. Kemi dëgjuar prej mediave dhe ka fjalë nga KQZ-ja. Zyrtarisht nuk e dina çka ka ndodh dhe kjo mbetët të vërtetohet”, tha ai.
KQZ-ja shqyrtoi edhe një kërkesë për realizimin e një exit-polli, ku nuk kishte vendimmarrje pasi u konsiderua se për realizimin e tyre jashtë qendrave të votimit nuk ka nevojë për leje.
Krahas këtyre u bë e ditur se në ditën e zgjedhjeve, më 9 shkurt do të jenë edhe 108 ekipe mobile për të mundësuar votimin për personat me nevoja të veçanta.
/KosovaPress/
