Presidentja e Kosovës, Vjosa Osmani ka pritur në takim kryeministrin në detyrë të Malit të Zi, Dritan Abazoviq, me të cilin i kanë vlerësuar si të shkëlqyeshme marrëdhëniet ndërmjet dy shteteve dhe kanë shprehur gatishmëri për thellimin e tyre.
Zyra e Presidentes bën të ditur se Osmani ka theksuar se Kosova me Malin e Zi ndajnë pikëpamjet e njëjta mbi rëndësinë e integrimit euroatlantik të shteteve të rajonit si garanci për paqe e prosperitet në rajon.
Sipas Presidentes Osmani, Mali i Zi është shtet mik dhe partner i Kosovës, ndaj ka shfaqur besimin se do ta mbështesë Kosovën edhe më tej në përpjekjen për forcimin e subjektivitetit ndërkombëtar duke përfshirë anëtarësimin në organizatat ndërkombëtare, për të cilën gjë ka marrë mbështetjen e kryeministrit Abazoviq.
Në takim u diskutua edhe për zhvillimet e fundit në vend dhe rajon dhe dialogun me Serbinë.
Presidentja Osmani ka potencuar se Marrëveshja e Brukselit, e trajton Kosovën dhe Serbinë si palë të barabarta në kontekstin e raporteve ndërshtetërore, megjithëse ka theksuar se Serbia “po vazhdon me obstruksione sa i përket zbatimit të marrëveshjes së arritur”.
Pavarësisht kësaj, presidentja Osmani theksoi se Kosova do të vazhdojë të koordinohet me aleatët ndërkombëtar rreth zbatimit të Marrëveshjes dhe se është e përkushtuar për paqe, siguri dhe stabilitet të qëndrueshëm.
Osmani dhe Abazoviq diskutuan edhe për zgjerimin e bashkëpunimit në fushën e shkëmbimit ekonomik, tregtar, turizëm, arsim dhe fusha të tjera të interesit të dyanshëm.
Kryeministri në detyrë i Malit të Zi, Dritan Abazoviq, i cili po zhvillon vizitë treditore në Kosovë, nënshkroi bashkë me kryeministrin e Kosovës, Albin Kurti, të premten, marrëveshje për shërbime ajrore të Kosovës dhe Malit të Zi, e cila zvogëlon kohën e fluturimeve nga Kosova në vendet tjera, ulë emetimet e gazit dhe zvogëlon koston e biletave të fluturimeve.
