Kryeministri Edi Rama deklaroi sot se rruga e njohjes përfundimtare të Kosovës kalon nga vetë Prishtina.
Në një intervistë televizive, Rama tha se është Prishtina, e cila duhet ta bëjë deri në fund përpjekjen dhe mos t’i shmanget shtegut të hapur të një mundësie të madhe që është krijuar me planin franko-gjerman, me dialogun në Bruksel, me mbështetjen e gjithë aleatëve që i dhanë jetë Kosovës së lirë demokratike dhe të pavarur.
Sipas tij, “është Prishtina që duhet të kuptojë që në vend se të shfrytëzojë gjithë këtë themel miqësish po e minon atë me një qasje që me gjithë përpjekjet e mia, jam i pasuksesshëm për ta kuptuar se ku do të dalë”.
“Ne e kemi diskutuar padiskutim edhe me Presidentin Zelensky, edhe e diskutojmë në çdo instancë me çdo lider që përfaqëson një vend që nuk e ka njohur Kosovën, por nga ana tjetër, ne jemi shumë të qartë dhe të bindur se rruga e njohjes përfundimtare të Kosovës nuk kalon as nga Ukraina, as nga Gana, Nigeria, por kalon nga vetë Prishtina”, u shpreh Rama.
I pyetur mbi reagimin e kryeministrit Albin Kurtit ndaj përfaqësuesit të BE-së, Lajçak, Rama tha se “janë gjëra që të lënë pa tekst dhe janë gjëra që dëmtojnë edhe më shumë atë që pretendohet se po përpiqen të riparojnë”.
“Sepse të ngresh një teori konspiracioni për një bashkëpunim që e zbulove mes Serbisë dhe Të Dërguarit Special të gjithë BE nuk është diçka e këshillueshme për t’u bërë. Po e përsëris, unë nuk dyshoj në dëshirën e madhe dhe të mirë të Albinit për të bërë më të mirën për Kosovën, por dëshira e madhe dhe vullneti i mirë nuk mjaftojnë asnjëherë. Duhet qartësia strategjike për të arritur qëllimin, gjë që nuk e shoh”, tha ai.
Rama theksoi se “Shqipëria nuk do që të ndikojë në Prishtinë, pasi në Prishtinë janë autoritetet që burojnë nga vullneti i popullit të Kosovës dhe janë ata që kanë përgjegjësinë për ta udhëhequr Kosovën dhe për të zgjedhur rrugën për të arritur te një qëllim, që e kemi të përbashkët”.
“Ne duam të njëjtën gjë, çështja është që ne mendojmë që rruga që ata kanë zgjedhur është rruga që nuk çon te arritja e atij qëllimi të përbashkët, po përkundrazi çon në një kurs përplasjeje me Shtetet e Bashkuara, me BE, pra me miqtë, me aleatët me partnerët në vend se të çojë të realizimi i këtij qëllimi të përbashkët, kjo është e trishtueshme, por unë kam besim sidoqoftë që kjo është e përkohshme”, shtoi ai.
Rama theksoi se “arsyeja pse BE insiston për këtë proces normalizimi është sepse duan të integrojnë Kosovën në gjithë ngrehinën e organizimit ndërkombëtar dhe në BE, gjë që nuk ka për të ndodhur kurrë nëse Kosova nuk e zgjidh këtë problem”.
“Është gjëja më e lehtë, që të tërheqësh opinionin publik pas vetes, duke marrë poza, kundërshtie dhe deri armiqësie ndaj atyre që janë të identifikuar si burimi i një të keqeje të madhe që i ka ndodhur Kosovës në të shkuarën jo shumë të largët, por pyetja këtu është: Çfarë sjell kjo? Sjell më shumë vota në Kosovë? Mbase. I sjell ato vota për një kohë të gjatë? Nuk besoj, por e sigurtë është që nuk sjell rezultatin e dëshiruar për Kosovën, që është përfundimi i një procesi normalizimi dhe pastaj i çlirimit të gjithë ngërçit të njohjeve në radhë të parë brenda vendeve të BE. Sepse ky është edhe synimi i planit franko-gjerman dhe kjo duhet të ishte arritje më e madhe e mundshme, që do të ishte një njohje de facto edhe e Serbisë, pavarësisht se do ta njihje apo jo formalisht Serbia Kosovën, kjo mbetej e parëndësishme, Kosova do të fitonte këtu ulësen e saj, do të çlirohej nga barra e këtij konflikti për të vijuar procesin e integrimit në BE, dhe kështu me radhë”, shtoi ai.
I pyetur nëse Serbia po përfiton nga kjo situatë, Rama tha se “kjo as nuk diskutohet, dhe nuk diskutohet që Serbia shikon interesat e veta, nuk sheh interesat tona”.
“Dhe ajo që është për të ardhur keq është se qasja e Prishtinës po i ndihmon Serbisë, nuk po ndihmon Kosovën sepse po viktimizon Serbinë në sytë e gjithë bashkësisë ndërkombëtare dhe në sytë e miqve dhe partnerëve tanë, po i mbyll gojën miqve dhe partnerëve tanë duke e kthyer Serbinë në një aktor që luan rolin e dikujt që është i penguar të bëjë gjënë që në fakt nëse Kosova do ishte proaktive dhe pozitive në dialog, Serbia mbase nuk do ta bënte, por ama do të ekspozohej dhe do ta merrte gjithë presionin ajo. Ndërkohë që kështu Serbia luan një teatër të cilin ia jep mundësinë ta luajë, politika dritëshkurtër e Prishtinës”, shtoi ai.
Rama i konsideroi po ashtu të kota përpjekjet e Serbisë dhe Rusisë për të rihapur çështjen e Kosovës në OKB.
“Janë përpjekje të kota, propagandistike, por që nuk çojnë asgjëkundi. Kosova e ka fituar luftën dhe Kosova Republikë, është konfirmuar edhe nga vetë Gjykata Ndërkombëtare dhe kjo është pa kthim. Çështja është që Kosova nuk po fiton dot paqen, nuk po arrin dot që paqen ta kthejë në një aset për t’u konfirmuar ndërkombëtarisht dhe për t’u zhvilluar në të gjitha drejtimet. Pra, po preferon një situatë as luftë, as paqe, ndërkohë që ka fituar luftën”, u shpreh Rama.
