Presidenti Ilir Meta dërgoi mesditën e së enjtes në Gjykatën Kushtetuese vendimin e qeverisë, i cili i kaloi pronësinë e Teatrit Kombëtar Bashkisë Tiranë.
Vendimi në fjalë autorizon Bashkinë të nisë ndërtimin e teatrit të ri në truallin e atij ekzistues, duke nënkuptuar këtu shembjen e tij.
Në një konferencë për shtyp Meta kërkoi që Gjykata Kushtetuese të pezullojë ekzekutimin e këtij vendimi pasi siç e cilësoi ai, njësoi si ligji special, edhe ky kalim prone “fsheh nga pas interesa private” të cilat “cenojnë parimet kushtetuese dhe interesin publik të qytetarëve”.
Meta theksoi se Teatri Kombëtar nuk mund të jetë pronë e Bashkisë Tiranë për faktin se përfaqëson vlera kulturore kombëtare dhe jo vendore.
“Kompleksi i godinave të teatrit është një kompleks pasuror me status të veçantë, është Teatri Kombëtar,” – u shpreh Presidenti, i cili kujtoi se Evropa përveç vlerave të tjera kërkon edhe kulturë dhe identitet.
Meta tha se e drejta për të vendosur për pasurinë materiale dhe jomateriale të karakterit kombëtar nuk mund t’i takojë një qeverie apo bashkie, por vetëm vullnetit të qytetarëve. Për këtë ai i bëri thirrje Gjykatës Kushtetuese që të vendosë pezullimin e këtij vendimi.
“Qytetarët kanë çështje më urgjente, që kanë të bëjnë me sigurinë, shëndetin, ekonominë, papunësinë për çështje të cilat ne i dimë, dhe kjo kërkon përgjegjshmëri dhe jo papërgjegjshmëri ekstreme,” – theksoi Meta duke kujtuar gjendjen nën pandemi dhe faktit se qeveria po tregohet e gatshme të shpenzojë fonde të mëdha publike për të ndërtuar një ndërtesë të re teatri.
Më 27 korrik 2019 Presidenti Meta dërgoi në Kushtetuese ligjin special që mundësonte ndërtimin e teatrit të ri përmes një marrëveshje me privatët, ku këta të fundit përfitonin leje për të ndërtuar edhe një kompleks godinash pas teatrit.
Por në fillim të këtij viti qeveria dhe Bashkia Tiranë u tërhoqën nga kjo formulë duke vendosur për ta ndërtuar teatrin me fonde publike.
Ridërgimi i çështjes në Gjykatën Kushtetuese vjen në një kohë kur Bashkia kishte vendosur në rendin e ditës së mbledhjes së radhës në Këshillin Bashkiak miratimin e “aktekspertizës së Institutit të Ndërtimit për shembjen e Teatrit Kombëtar”.
Mbledhja në fjalë ishte parashikuar për më 15 maj, por me një vendim të fundit, u shty për të hënën më 18 maj.