Bashkimi Evropian ka nevojë për një strategji të re për luftën në Ukrainë pasi sanksionet kundër Moskës nuk kanë funksionuar, tha të shtunën kryeministri hungarez Viktor Orban.
“Nevojitet një strategji e re e cila duhet të fokusojë bisedimet e paqes dhe hartimin e një propozimi të mirë paqeje…në vend që të fitojë luftën,” tha Orban në një fjalim në Rumani.
Orban, i rizgjedhur për një mandat të katërt radhazi në prill, përsëriti se Hungaria – një anëtare e NATO-s – do të qëndronte jashtë luftës në Ukrainën fqinje.
Ai po përballet me sfidën e tij më të vështirë që nga marrja e pushtetit në vitin 2010, me inflacion dyshifror, një forintë të dobët dhe fondet e BE-së ende të ngecura mes një mosmarrëveshjeje me Brukselin mbi standardet demokratike.
Orban ka thënë më parë se Hungaria nuk është e gatshme të mbështesë embargot ose kufizimet e BE-së për importet e gazit rus pasi kjo do të minonte ekonominë e saj, e cila është rreth 85% e varur nga importet e gazit rus.
Ai tha në fjalimin e tij se strategjia perëndimore për Ukrainën është ndërtuar mbi katër shtylla – se Ukraina mund të fitojë një luftë kundër Rusisë me armët e NATO-s, se sanksionet do ta dobësonin Rusinë dhe do të destabilizonin udhëheqjen e saj, se sanksionet do ta dëmtonin Rusinë më shumë se Evropën, dhe se bota do të rreshtohej në mbështetje të Evropës.
Orban tha se kjo strategji ka dështuar pasi qeveritë në Evropë po shemben “si domino”, çmimet e energjisë janë rritur dhe tani duhej një strategji e re.
“Ne jemi ulur në një makinë që ka një shpim në të katër gomat: është absolutisht e qartë se lufta nuk mund të fitohet në këtë mënyrë,” u tha Orban mbështetësve të tij.
Ai tha se Ukraina nuk do ta fitojë kurrë luftën në këtë mënyrë “thjesht sepse ushtria ruse ka dominim asimetrik”.
Orban tha se nuk kishte asnjë shans për bisedime paqeje midis Rusisë dhe Ukrainës.
“Meqë Rusia kërkon garanci sigurie, kjo luftë mund të përfundojë vetëm me bisedimet e paqes midis Rusisë dhe Amerikës”, tha ai.
/Argumentum.al
