Parlamenti i Kosovës ratifikon marrëveshjen për energjinë me MCC-në

Me 89 vota për dhe asnjë kundër, Parlamenti i Kosovës ratifikoi të enjten marrëveshjen e programit kompakt të Korporatës amerikane Sfidat e Mijëvjeçarit me Kosovën, që parasheh investimin e mbi 236 milionë dollarëve në sektorin e energjisë.

Zëvendëskryeministri i Kosovës, Besnik Bislimi, duke paraqitur projektligjin tha se programi Kompakt paraqet investimin më të madh në sektorin e energjisë që nga paslufta dhe është shtyllë e vazhdimit të marrëdhënieve strategjike me Shtetet e Bashkuara të Amerikës.

“Shtetet e Bashkuara të Amerikës përmes Korporatës së Sfidave të Mijëvjeçarit janë pajtuar t’i japin Kosovës grant në vlerë prej 202 milionë dollarëve që është granti më i madh i njëhershëm në historinë e Kosovës së pasluftës. Qeveria e Kosovës është zotuar se do të mbështesë programin me 34.7 milionë dollarë si bashkëfinancim, duke e çuar vlerën totale të tij në 236.7 milionë dollarë. Programi Kompakt synon të stabilizojë furnizimin me energjinë elektrike, të zhvillojë fuqinë punëtore profesionale dhe gjithëpërfshirëse në energji si dhe të mbështesë sektorin privat në investime në energji”, tha ai.

Projekti pritet të zbatohet në tërësi deri në vitin 2027.

Presidentja Vjosa Osmani dhe kryeministri Albin Kurti kanë reaguar pasi Kuvendi i Kosovës ratifikoi Marrëveshjen me MCC-në,

Osmani tha se vendimi i sotëm i Kuvendit paraqet angazhimin institucional më serioz drejt tranzicionit energjetik në Kosovë dhe konfirmimin e partneritetit strategjik me Shtetet e Bashkuara të Amerikës, shkruan RTK

“Mirëpres mbështetjen njëzëri në Kuvend, ku sot u ratifikua marrëveshja ndërmjet Republikës së Kosovës dhe Shteteve të Bashkuara të Amerikës, e përfaqësuar nga Korporata e Sfidave të Mijëvjeçarit për Programin e Kompaktit. Përveç konfirmimit të partneritetit strategjik me SHBA-në, vendimi i sotëm i Kuvendit paraqet angazhimin tonë institucional më serioz drejt trancizionit energjetik në Kosovë”, ka shkruar Osmani në rrjetin social Facebook.

Kurse Kryeministri Albin Kurti ka  thënë se nuk ka pozitë e opozitë për progresin e Kosovës dhe ndihmën e SHBA-ve.

“Ende pa u bërë 2/3 e një dite të vetme pas nënshkrimit të marrëveshjes në Washington DC, Kuvendi i Kosovës i kaloi 2/3 e deputetëve duke e ratifikuar atë sot. I falënderoj të gjithë dhe secilin nga 89 deputetët që me votën e tyre PËR ratifikuan grantin mbi 200 milionësh të MCC-së për energji e zhvillim. Mbështetja unanime e legjislativit për Programin Kompakt konfirmon ndikimin universal të saj: do të përfitojnë të gjithë qytetarët e Republikës” ka shkruar Kurti në rrjetin social Facebook.

Sipas tij nëpërmjet këtij granti, ‘bashkë po e trasojmë rrugën për një të ardhme energjetike të qëndrueshme, të sigurt dhe të pastër’.

“Një investim gjigand që do të sjellë investime të reja”, ka shtuar Kurti.

/Argumentum.al