Autoritetet kineze kanë nisur operacione të plota shpëtimi pas një fatkeqësie që goditi rajonin kufitar Kinë-Nepal dhe shkaktoi viktima nga të dyja palët.
Deri në orën 8 të mëngjesit të së enjtes, një rrëshqitje dheu kishte shkaktuar tre të vdekur dhe 558 të zhdukur në kontenë Gyirong në jugperëndim të Rajonit Autonom të Xizang-ut të Kinës, sipas komandës në vijën e parë të frontit në qytetin Xigaze.
Rrëshqitje nga përmbytjet e rënda në Veri të Nepalit / VCG
Në veri të Nepalit, përmbytjet e rënda dhe të vrullshme kanë shkaktuar 162 të vdekur, sipas informacioneve më të fundit nga policia dhe zyra e kryeministrit. 484 turistë të tjerë janë të zhdukur, përfshirë 391 shtetas të huaj.
foto nga CMG
Ministria e Burimeve Natyrore e Kinës aktivizoi një përgjigje emergjente të nivelit II për katastrofat gjeologjike, e dyta më e lartë në sistemin prej katër nivelesh të reagimit emergjent të Kinës, dhe dërgoi një grup pune për të udhëhequr operacionet e shpëtimit dhe për të parandaluar fatkeqësitë dytësore.
Komisioni Kombëtar për Parandalimin, Pakësimin dhe Ndihmën në Fatkeqësi, së bashku me Ministrinë e Menaxhimit të Emergjencave, nisën një përgjigje emergjente të nivelit II për ndihmën në raste fatkeqësish.
foto nga Xinhua
Ministria e Menaxhimit të Emergjencave ka mobilizuar 249 veta nga forca kombëtare gjithëpërfshirëse e zjarrfikësve dhe e shpëtimit dhe një personel inxhinierik shpëtimi të përbërë prej 325 vetash nga kompanitë “China Anneng”, “PowerChina” e organizata të tjera. 111 zjarrfikës dhe punonjës shpëtimi të tjerë nga Pekini dhe provinca Sichuan në jugperëndim të Kinës u dërguan në Xizang. Një aeroplan i posaçëm për shpëtimin urgjent që transportonte pajisje të përparuara gjithashtu është nisur për në Xigaze.
Komisioni Kombëtar për Parandalimin, Pakësimin dhe Ndihmën në Fatkeqësi dhe Ministria e Menaxhimit të Emergjencave ndanë 30 000 furnizime qendrore ndihme, përfshirë çadra, soba, veshje, batanije, shtretër të palosshëm dhe tapete të padepërtueshme nga lagështia, për të mbështetur evakuimin, zhvendosjen dhe punën e ndihmës.
foto nga VCG
Ministria e Financave dhe Ministria e Menaxhimit të Emergjencave kanë caktuar 120 milionë juanë (rreth 17.7 milionë dollarë) nga fondet qendrore të ndihmës në rast fatkeqësie natyrore për të mbështetur Xizang-un në kryerjen e operacioneve emergjente të shpëtimit dhe ndihmës në fatkeqësi.
Ndërkohë, Komisioni Kombëtar i Reformës dhe Zhvillimit ka caktuar 100 milionë juanë investime në buxhetin qendror për të mbështetur përpjekjet emergjente të rimëkëmbjes dhe rindërtimit pas fatkeqësisë në kontenë Gyirong.
Rrëshqitja e dheut preu rrugët që çonin në pikën kufitare Gyirong në anën kineze dhe ndërpreu komunikimin e furnizimin me energji. 85 punonjës riparimi nga dega e Rrjetit Elektrik Shtetëror e Xizang-ut kanë mbërritur në kontenë Gyirong.
Në Nepal, përmbytjet e rënda dëmtuan rrugë, ura dhe hidrocentrale, duke shkaktuar ndërprerje të energjisë elektrike dhe evakuime emergjente përgjatë lumit Bhote Koshi./cgtn
