Departamenti i Shtetit i Shteteve të Bashkuara ka vendosur të pezullojë përpunimin e vizave të emigrantëve për Shqipërinë, Kosovën dhe 75 vende të tjera, në kuadër të një goditjeje të re ndaj emigracionit të paligjshëm dhe aplikantëve që konsiderohen si rrezik për t’u kthyer në barrë publike për shtetin amerikan.
Sipas një memoje të brendshme të Departamentit të Shtetit, e raportuar për herë të parë nga Fox News, zyrtarët konsullorë janë udhëzuar që të refuzojnë aplikimet për vizë bazuar në ligjin ekzistues të emigracionit, ndërkohë që po zhvillohet një rishikim i plotë i procedurave të shqyrtimit dhe verifikimit.
Pezullimi hyn në fuqi më 21 janar
Vendimi pritet të hyjë në fuqi më 21 janar dhe do të mbetet aktiv për një periudhë të pacaktuar, derisa autoritetet amerikane të përfundojnë procesin e rishikimit të politikave të vizave.
Lista e vendeve të prekura përfshin, mes të tjerash:
Shqipërinë, Kosovën, Somalinë, Rusinë, Afganistanin, Brazilin, Iranin, Irakun, Egjiptin, Nigerinë, Tajlandën dhe Jemenin.
Sipas raportimit të Fox News, që në nëntor 2025, Departamenti i Shtetit kishte shpërndarë një kabllogram zyrtar në të gjitha misionet diplomatike amerikane, duke udhëzuar stafin konsullor të zbatonte masa më të rrepta shqyrtimi në përputhje me dispozitën e njohur si “public charge” (barrë publike) në ligjin amerikan të emigracionit.
Sipas këtyre udhëzimeve, zyrtarët konsullorë janë të detyruar të refuzojnë vizat e aplikantëve që vlerësohen se mund të varen nga ndihma publike në SHBA.
Kush rrezikon refuzimin e vizës
Sipas udhëzimeve, zyrtarët janë të detyruar t’u refuzojnë vizat aplikantëve që konsiderohen të varur nga ndihma publike. Vlerësimi merr në konsideratë faktorë të tillë si shëndeti i aplikantit, mosha, aftësia në gjuhën angleze, gjendja financiare dhe nevoja e mundshme për kujdes mjekësor afatgjatë. Aplikantët që janë më të moshuar, mbipeshë ose që kanë marrë më parë ndihmë financiare nga qeveria ose kanë qenë të shtruar në spital mund të përballen gjithashtu me refuzim.
Lista e plotë e vendeve:
Afganistani, Shqipëria, Algjeri, Antigua dhe Barbudën, Armeninë, Azerbajxhanin, Bahamas, Bangladeshin, Barbadosin, Bjellorusinë, Belizen, Butanin, Bosnjën, Brazilin, Burmën, Kamboxhian, Kamerunin, Kepin e Gjelbër, Kolumbinë, Bregun e Fildishtë, Kubën, Republikën Demokratike të Kongos, Dominiken, Egjiptin, Eritrenë, Etiopinë, Fixhin, Gambian, Gjeorgjinë, Ganën, Grenadën, Guatemalën, Guinenë, Haitin, Iranin, Irakun, Xhamajkën, Jordaninë, Kazakistanin, Kosovën, Kuvajtin, Kirgistanin, Laosin, Libanin, Liberinë, Libinë, Maqedoninë e Veriut, Moldavinë, Mongolinë, Malin e Zi, Marokun, Nepalin, Nikaraguanë, Nigerinë, Pakistanin, Republikën e Kongos, Rusinë, Ruandën, Shën Kitsin dhe Nevisin, Shën Luçinë, Shën Vincenti dhe Grenadinet, Senegalin, Sierra Leonen, Somalinë, Sudanin e Jugut, Sudanin, Sirinë, Tanzaninë, Tajlandën, Togon, Tunizinë, Ugandën, Uruguain, Uzbekistanin dhe Jemenin.
Çuditërisht në këtë listë janë përfshirë vende mike dhe partnerë të SHBA-së si Shqipëria, Kosova, Mali i Zi dhe Maqedonia e Veriut, tre nga këto shtete janë anëtare të NATO-s në Ballkan, por nga lista është përjashtuar Serbia, e cila nuk është anëtare e NATO-s, dhe gjithashtu ka qenë e përfshirë në konflikte rajonale dhe mban lidhje të ngushta me Rusinë. Kjo e bën këtë liste të duket e paqartë, ndërsa njëkohësisht pasqyron në mënyrë të paqartë edhe linjën e politikës së jashtme të SHBA-së ndaj rajonit tonë.
/Argumentum.al
