Presidenti amerikan Donald Trump ka nënshkruar një urdhër ekzekutiv që udhëzon administratën e tij të ndryshojë emrin e Liqenit Ontario në “Lake America” (Liqeni i Amerikës), në një tjetër zhvillim simbolik mes luftës tregtare që po përshkallëzohet me Kanadanë.
Vendimi i Trump, të cilin presidenti amerikan e kishte paralajmëruar më herët, i kërkon Bordit të SHBA-së për Emrat Gjeografikë të formalizojë ndryshimin e emërtimit në përdorimin zyrtar federal amerikan.
Gjatë ceremonisë së nënshkrimit të urdhrit, Trump e krahasoi këtë veprim me vendimin e tij të mëparshëm për riemërtimin e Gjirit të Meksikës si “Gjiri i Amerikës”.
“Nëse mendoni për këtë, ne kemi një gji dhe kemi një liqen. Tani gjithçka që na duhet është një oqean”, tha Trump.
“Pra, ndoshta do të na duhet të ndryshojmë emrin e Atlantikut dhe/ose Paqësorit”, shtoi ai me ironi.
Riemërtimi i Liqenit Ontario vjen në një periudhë tensionesh të shtuara mes Uashingtonit dhe Otavës, veçanërisht për çështjet tregtare dhe tarifat doganore.
Megjithatë, ndryshimi i emrit nga administrata amerikane ka fuqi vetëm në kuadrin e përdorimit zyrtar federal të SHBA-së. Kanadaja nuk është e detyruar ta njohë emërtimin e ri dhe pritet të vazhdojë ta quajë atë Liqeni Ontario.
Vendimi i Trump është kështu jo vetëm një çështje administrative, por edhe një tjetër gjest politik dhe simbolik në marrëdhëniet gjithnjë e më të tensionuara SHBA–Kanada.
/Argumentum.al
