Presidenti serb Aleksandar Vuçiq tha në një konferencë të përbashkët për shtyp pas takimit me kryeministrin spanjoll Pedro Sanchez se Madridi e mbështet Serbinë në rrugën e saj drejt BE-së pa kushte shtesë. Ai falënderoi qeverinë spanjolle për respektimin e integritetit territorial të Serbisë. Pedro Sánchez theksoi se Spanja e mbështet Serbinë kur është fjala për Kosovën, se ajo do të jetë gjithmonë në diskutim, por se, pa asnjë dyshim, integriteti territorial duhet të respektohet gjithmonë.
Aleksandar Vuçiq tha se është krenar dhe i lumtur që për herë të parë në historinë serbe mund të presë në Serbi kreun e qeverisë spanjolle.
“Ishte privilegj, kënaqësi dhe nder të flisja sot me zotin Sanchez”, tha presidenti i Serbisë dhe theksoi: “Serbia e konsideron dhe e percepton Spanjën si një mik të sinqertë, si një nga miqtë më të mëdhenj në botë. Së fundmi kemi rritur ndjeshëm shkëmbimin tonë tregtar i cili vitin e kaluar ishte 811 milionë euro, ndërsa këtë vit në pesë muajt e parë është rritur për 64.1 për qind”.
Vuçiq tha se kanë biseduar për vendosjen e marrëdhënieve edhe më të ngushta ekonomike, ndërsa paralajmëroi mbajtjen e një forumi biznesi në Beograd në tetor, ku do të takohen biznesmenët nga të dy vendet.
Sanchez: Serbinë dhe Spanjën i lidhin shumë gjëra
Kryeministri spanjoll Pedro Sánchez tha se Spanja e mbështet Serbinë për çështjen e Kosovës dhe se do të jetë gjithmonë me të në mbrojtje të parimeve të së drejtës ndërkombëtare dhe integritetit territorial dhe sovranitetit, për të cilat të dyja vendet qëndrojnë.
Sánchez shtoi gjithashtu se Serbia duhet të bëhet anëtare e plotë e BE-së dhe se Spanja do të jetë gjithmonë me të në rrugën e integrimit evropian.
“Spanja dhe Serbia kanë qenë miq për një kohë të gjatë, ne jemi të lidhur me shumë gjëra, siç është nevoja për të respektuar të drejtën ndërkombëtare dhe integritetin territorial dhe sovranitetin e vendeve tona”, tha Sanchez.
Ai ka theksuar se kjo është arsyeja pse Spanja e mbështet Serbinë për çështjen e Kosovës dhe tha se Spanja do të jetë gjithmonë me Serbinë në mbrojtje të këtyre parimeve. Sanchez shtoi se Spanja mbron që problemet mes dy palëve duhet të zgjidhen përmes dialogut, por se integriteti territorial duhet të respektohet.
Ai përkujtoi se Serbia është në rrugën evropiane që nga viti 2002 dhe tha se Beogradi gjithmonë mund të llogarisë në mbështetjen e Spanjës.
Marrëdhëniet politike mes Spanjës dhe Serbisë janë fantastike dhe jam i bindur se marrëdhëniet ekonomike dhe tregtare mund të arrijnë atë nivel”, tha Sanchez.
/Argumentum.al
