Në prag të Ditës Kombëtare të Zvicrës, Ambasada e Zvicrës në Tiranë organizoi pritjen tradicionale në Rezidencën Zvicerane, duke e kthyer ceremoninë në një moment reflektimi mbi partneritetin e qëndrueshëm mes Zvicrës dhe Shqipërisë. Veprimtaria vuri në fokus bashkëpunimin shumëvjeçar ndërmjet dy vendeve, mbështetjen zvicerane për zhvillimin e Shqipërisë dhe angazhimin e përbashkët për forcimin e marrëdhënieve dypalëshe.
Ambasadorja zvicerane Ruth Huber mirëpriti përfaqësues të qeverisë qendrore dhe vendore, shoqërisë civile, komuniteteve fetare, komunitetit diplomatik dhe medias. Eventi i këtij viti festoi lidhjet e ngushta midis Zvicrës dhe Shqipërisë, me një fjalim të përzemërt nga Ministri për Evropën dhe Punët e Jashtme Ferit Hoxha.
Ambasadorja Huber theksoi marrëdhëniet e shkëlqyera dypalëshe midis Zvicrës dhe Shqipërisë.
“Sot, marrëdhëniet tona dypalëshe janë të forta dhe vazhdojnë të rriten. Kjo në vetvete është një arsye për të festuar. Përmes programit tonë të bashkëpunimit, Zvicra ka shoqëruar transformimin dhe zhvillimin e Shqipërisë për më shumë se tre dekada. Zvicra vlerëson shumë progresin e vazhdueshëm të Shqipërisë dhe angazhimin e saj ndaj integrimit evropian – një qëllim që të gjithë e ndajmë me Shqipërinë dhe qytetarët e saj”, tha Ambasadorja Huber.
Ministri i Shqipërisë për Evropën dhe Punët e Jashtme, Ferit Hoxha, theksoi tiparet unike të Zvicrës, të tilla si diversiteti, aftësia e grupeve të ndryshme për të jetuar së bashku, për të respektuar dallimet dhe për të bërë kompromis kur është e nevojshme. Ai gjithashtu përgëzoi mbështetjen e Zvicrës për zhvillimin e Shqipërisë. “Shqipëria dhe Zvicra ndajnë një miqësi dhe marrëdhënie të gjatë të ndërtuar mbi besimin dhe respektin e ndërsjellë. Zvicra ka qenë një partner i vlefshëm i Shqipërisë për shumë vite, duke mbështetur transformimin tonë demokratik. Dhe po, bashkëpunimi zviceran ka lënë një gjurmë të qëndrueshme në këtë vend. Jemi thellësisht mirënjohës”, tha Ministri.
Ambasadorja Huber prezantoi disa nga pikat kryesore të Programit të Bashkëpunimit Zviceran 2026-2028 në mbështetje të qeverisjes gjithëpërfshirëse, zhvillimit ekonomik dhe shërbimeve të besueshme të infrastrukturës në Shqipëri.
Ky aktivitet ishte veçanërisht domethënës pasi shënoi festimin e fundit të Ditës Kombëtare të Zvicrës për Ambasadoren Huber në Shqipëri. “Shërbimi si Ambasadore këtu ka qenë si një privilegj profesional po ashtu edhe një pasurim personal. Do të largohem me një ndjenjë të thellë dashurie për këtë vend dhe popullin e tij. Dhe i falënderoj të gjithë partnerët tanë shqiptarë – në Qeveri, shoqërinë civile, grupet e mendimit, sektorin privat dhe të tjerë. Keni mirënjohjen time të sinqertë dhe premtimin se lidhja jonë do të vazhdojë!”, tha Ambasadorja Huber.
Në pritje, vizitorët patën mundësinë të merrnin dhurata: vaj ulliri me cilësi të lartë dhe bimë aromatike të sponsorizuara nga bizneset shqiptare që janë mbështetur përmes Programit të Bashkëpunimit Zviceran gjatë viteve. Të ftuarit shijuan gjithashtu raclette-n tradicionale, ëmbëlsira zvicerane dhe verëra Chardonnay dhe Merlot nga kantonet e Vaud dhe Ticino. Video dinamike shfaqën bukurinë e Zvicrës së bashku me momente të paharrueshme nga shumë projekte që Zvicra ka mbështetur dhe zbatuar në Shqipëri gjatë viteve.
Zvicra feston Ditën e saj Kombëtare më 1 gusht, duke përkujtuar Paktin e Rütli në vitin 1291, kur tre kantone zvicerane formuan aleancën që më vonë do të bëhej Konfederata Zvicerane.
© 2026 Argumentum
