Presidenti i Türkiyes, Recep Tayyip Erdoğan, tha se me fundin e pushtimit gati 30-vjeçar të Karabakut nga Armenia, u hap një dritare historike e mundësive për paqen e qëndrueshme në rajon, duke shtuar se është “vendimtare” që kjo dritare të mos mbyllet, raporton Anadolu.
Duke folur në një konferencë shtypi në kryeqytetin Ankara së bashku me homologun e tij azerbajxhanas Ilham Aliyev, Erdoğan tha se Türkiye do të vazhdojë të punojë për të siguruar vleftësimin e kredencialeve të Azerbajxhanit në Asamblenë Parlamentare të Këshillit të Evropës (APKE).
“Ne do të vazhdojmë mbështetjen dhe përpjekjet tona për Azerbajxhanin derisa vendimi (mosratifikimi i kredencialeve të tyre) të anulohet”, tha Erdoğan
Muajin e kaluar, APKE-ja votoi për të mohuar vlefshmërinë e kredencialeve të delegacionit të Azerbajxhanit në organ, duke pretenduar se ai nuk i ka përmbushur angazhimet kryesore në kuadër të anëtarësimit në Këshillin e Evropës.
Për lidhjet tregtare, Erdoğan tha: “Vëllimi i përgjithshëm tregtar turko-azerbajxhanas vitin e kaluar arriti në 7,5 miliardë dollarë për herë të parë. Ne do të shtojmë përpjekjet tona për të arritur një objektiv prej 15 miliardë dollarësh”, shtoi Erdoğan.
Erdoğan mirëpriti sot Aliyevin në kryeqytetin Ankara për të diskutuar të gjitha aspektet e marrëdhënieve dypalëshe, si dhe hapat për bashkëpunimin e mëtejshëm midis dy vendeve.
Vizita e Aliyevit në Ankara është udhëtimi i tij i parë jashtë vendit që kur u rizgjodh në fillim të këtij muaji.
