Shefi i politikës së jashtme të BE-së, Josep Borrell, ka propozuar pezullimin zyrtar të dialogut politik me Izraelin për shkak të mosrespektimit të ligjit ndërkombëtar në Rripin e Gazës, raporton Anadolu.
“Pas një viti thirrjesh të padëgjuara nga autoritetet izraelite në lidhje me respektimin e ligjit ndërkombëtar në luftën e Gazës, ne nuk mund të vazhdojmë me gjërat si zakonisht”, tha Josep Borrell në një postim në blog.
“Kjo është arsyeja pse unë u kam propozuar vendeve anëtare të BE-së që të ndalojnë importet nga vendbanimet ilegale dhe të pezullojnë dialogun politik me Izraelin. Ne do t’i diskutojmë këto masa në Këshillin e Punëve të Jashtme javën e ardhshme”, shtoi ai.
Dialogu politik është pjesë e një marrëveshjeje më të gjerë mbi marrëdhëniet midis BE-së dhe Izraelit, duke përfshirë marrëdhëniet më të ngushta ekonomike, që hyri në fuqi në qershor 2000. Për pezullim, nevojitet miratim nga 27 vendet e BE-së.
Borrell, mandati pesëvjeçar i të cilit përfundon më 1 dhjetor, tha se njerëzve në Gaza “po u mbaron gjithçka” dhe në shumë pjesë të enklavës “nuk ka pothuajse asgjë që mund të mbështesë jetën e organizuar njerëzore”.
“Gaza veriore, ku banojnë më shumë se një milion njerëz, është zbrazur plotësisht pas disa javësh granatime të pamëshirshme, duke shkatërruar qendrat e fundit shëndetësore, strehimoret dhe shkollat e mbetura”, tha ai.
Borrell paralajmëroi se modeli u zhvillua në Gaza tani po përsëritej në Bregun Perëndimor dhe Liban nga Izraeli.
“Respektoni ligjin ndërkombëtar humanitar; respektoni urdhrat detyruese të Gjykatës Ndërkombëtare të Drejtësisë; siguroni qasje humanitare; pajtohuni me propozimin e armëpushimit të Presidentit Biden; lejoni gazetarët ndërkombëtarë dhe hetuesit e mandatuar nga OKB të hyjnë në Gaza… Duke parë mbrapa, lista thirrjeve që ranë në vesh të shurdhër në Izrael tani është shumë e gjatë për t’u rrëfyer”, tha zyrtari i BE-së.
Izraeli ka vrarë më shumë se 43.700 njerëz në Gaza që nga sulmet e Hamasit të 7 tetorit 2023. Veprimet kanë shkaktuar një katastrofë humanitare, ndërsa Izraeli përballet me padi për gjenocid në Gjykatën Ndërkombëtare të Drejtësisë për luftën e tij vdekjeprurëse në Gaza.
“Pasoja domethënëse” për Izraelin
Borrell argumentoi se ruajtja e “rendit botëror të bazuar në rregulla fillon duke zbatuar rregullat e tij pa dallim”, dhe në situata të tjera ku këto rregulla ndërkombëtare shkelen në mënyrë rutinore, ka pasur ndalime vizash, listime terroriste, kufizime importi dhe sanksione ekonomike.
Megjithatë, deri më tani, Izraeli është kursyer nga çdo “pasojë domethënëse”, tha ai.
“Kjo duhet të ndryshojë. Kjo është arsyeja pse unë kam propozuar një ndalim importi për produktet e vendbanimeve të paligjshme, bazuar në opinionin e fundit këshillues të Gjykatës Ndërkombëtare të Drejtësisë”, tha zyrtari i BE-së.
Ai gjithashtu tha se i kërkoi përfaqësuesit special të BE-së për të drejtat e njeriut një vlerësim të përputhshmërisë së Izraelit me Marrëveshjen e Asociimit me BE-në.
