Presidenti amerikan, Donald Trump, njoftoi se ka hyrë në fuqi menjëherë një armëpushim energjetik mes Rusisë dhe Ukrainës, duke pretenduar se të dyja palët kanë rënë dakord të ndalojnë sulmet ndaj infrastrukturës energjetike.
“Me efekt të menjëhershëm, është në fuqi një ARMËPUSHIM ENERGJETIK në luftën mes Rusisë dhe Ukrainës. Të dyja palët kanë rënë dakord. Mos e shkelni atë!”, shkroi Trump në platformën e tij Truth Social.
Megjithatë, njoftimi i presidentit amerikan u prit me habi nga presidenti ukrainas, Volodymyr Zelensky, i cili deklaroi se nuk ishte në dijeni të një marrëveshjeje të tillë.
“Njoftimi për armëpushimin ishte lajm për mua. Por, nëse rusët pranojnë një armëpushim energjetik, Ukraina do ta pranojë atë. Nëse presidenti Trump e ka negociuar këtë me Putinin, ju lutemi na tregoni se kur do të fillojë armëpushimi”, deklaroi Zelensky, sipas gazetarit të Axios, Barak Ravid.
“Ne jemi gati dhe do ta pranojmë atë”, shtoi presidenti ukrainas.
Sipas raportimeve të mediave ndërkombëtare, deri në momentin e njoftimit nuk kishte një konfirmim të qartë nga Moska për marrëveshjen, ndërsa kushtet konkrete dhe mekanizmat për zbatimin e saj mbeteshin të paqartë.
Një armëpushim energjetik do të nënkuptonte ndalimin e sulmeve ndaj objekteve energjetike të të dyja vendeve, në një moment kur infrastruktura energjetike mbetet një nga objektivat kryesore të luftës dhe afrimi i dimrit rrit rëndësinë e furnizimit me energji.
Megjithatë, qëndrimi i Kievit është se ndalimi i sulmeve duhet të jetë i ndërsjellë dhe të shoqërohet me garanci konkrete, në mënyrë që njoftimi të shndërrohet në një marrëveshje reale dhe të zbatueshme.
© 2026 Argumentum
