Teksa procesi i numërimit të votave nga zgjedhjet parlamentare të 11 majit po i afrohet fundit, kryetari i Partisë Demokratike, Sali Berisha, ka dalë me akuza të forta ndaj procesit zgjedhor, duke thënë se “zgjedhjet e 11 majit u diktuan nga krimi”.
Në një deklaratë për mediet sot nga selia e PD-së, Berisha si drejtues i koalicionit “Partia Demokratike – Aleanca për Shqipërinë Madhështore” në zgjedhjet e 11 majit, tha se këto “ishin zgjedhjet më të grabitura, më të plaçkitura në tërë historinë elektorale në Shqipërinë pluraliste”.
Sipas Berishës, “bandat kriminale të qeverisë ishin aktive në 10 qarqe të Shqipërisë, në 20 bashki të vendit dhe ato patronuan 30 deputetë të mazhorancës kriminale”.
“Skenat që patë në Vorë, ku banda e Xhabaftit diktoi në mënyrë të dhunshme vullnetin e qytetarëve të Vorës bënë që kryebanditi Blendi Xhabafti mori vota dhjetë herë më shumë se kandidati i dytë në lista”, tha Berisha.
Berisha tha se “skena si Vora ishin të zakonshme në një seri qarqesh dhe bashkish të tjera, Durrës, Peshkopi, Elbasan, Fier dhe zona të tjera. Pra, në çdo aspekt këto ishin zgjedhjet më të grabitura, më të plaçkitura dhe më të dhunuara në tërë historinë elektorale të Shqipërisë pluraliste”.
“Kurrë ndonjëherë bandat nuk kanë prurë kaq shumë përfaqësues të tyre në parlamentin shqiptar sa në këtë parlament nga veriu në jug, nga lindja në perëndim. Mund t’u them ju se në rrethin e Durrësit, bandat punonin për deputetë të veçantë”, u shpreh Berisha.
“Zgjedhjet e 11 majit u karakterizuan nga blerja publike më masive në tërë historinë e zgjedhjeve në Shqipëri. Zarfi me 100 euro, i dërguar në mes të fushatës elektorale dhe amnistia prej 200 milionë euro gjoba dhe kamata nga viti 2015 deri në vitin 2025, është blerja publike më e fuqishme që ka ndodhur në historinë e vendit”, tha Berisha.
Berisha theksoi se “punësimi, punë për votë, u aplikua masivisht në këto zgjedhje”.
“Dhjetëra mijëra hektarë kanabis që u dhanë licencat për t’u mbjellë. Çdo bimë kanabis me prodhim fitimi 1 mijë euro, është përllogaritur për blerje votash në mënyrën më të pamëshirë”, tha Berisha.
Berisha nënvizoi se “ne po evidentojmë me shumë përgjegjësi krimin elektoral”.
Berisha thirri protestë paqësore më 16 maj, ditën kur edhe do të zhvillohet Samiti i Komunitetit Politik Evropian në Tiranë.
“Libri i zi i këtyre zgjedhjeve shkruhet më datën 16, në ora 17:00, në Bulevardin Zogu i Parë për të sensibilizuar opinionin publik botëror mbi krimet monstruoze të përbindëshit elektoral Edi Rama, që nuk respekton asnjë rregull, asnjë ligj kombëtar dhe ndërkombëtar për zgjedhjet. Protesta do të jetë paqësore”, tha Berisha.
“Ne garantojmë se nuk do ketë probleme që të cenojnë në shkallën më të vogël sigurinë e dinjitarëve që vijnë, por duam që ata të mësojnë se kanë qenë të ftuar nga një narkodiktator që nuk njeh ligj, as moral për votën dhe vullnetin e qytetarëve të tij”, tha Berisha.
