Kina do t’i përkushtohet progresit të qytetërimit njerëzor, nëpërmjet nxitjes së shkëmbimeve midis qytetërimeve të ndryshme, deklaroi të premten zv/Presidenti i vendit Han Zheng, në një fjalim në ceremoninë e hapjes së Dialogut të Katërt mbi Shkëmbimet dhe Mësimin e Ndërsjellë midis Qytetërimeve, në Dunhuang të Kinës Veriperëndimore.
Han Zheng tha se shkëmbimet dhe mësimi i ndërsjellë midis qytetërimeve, janë një forcë e rëndësishme për të nxitur përparimin e qytetërimit njerëzor, si edhe paqen dhe zhvillimin botëror. Sot, kur e ardhmja e të gjitha vendeve është e lidhur ngushtë, toleranca dhe bashkëjetesa, apo shkëmbimet dhe mësimi i ndërsjellë midis qytetërimeve të ndryshme, do ta ndihmojnë njerëzimin të bëjë përparime të përbashkëta dhe të promovojë prosperitetin dhe zhvillimin botëror.
“Ne duhet të respektojmë arritjet reciproke të njëri-tjetrit, të promovojmë respektimin e diversitetit të qytetërimeve botërore, si edhe të nxisim jo vetëm shijimin e bukurisë së qytetërimit tonë por edhe të të tjerëve. Duhet të kërkojmë pika të përbashkëta, duke mënjanuar dallimet dhe të përballemi së bashku me sfidat, për të formuar një peisazh të bukur të qytetërimit njerëzor, të bazuar mbi vlerat e përbashkëta njerëzore. Ne duhet të zhvillojmë një dialog të sinqertë dhe bashkëpunime me përfitime reciproke, të eliminojmë barrierat dhe keqkuptimet përmes komunikimit, të forcojmë konsensusin dhe ndjenjat miqësore, të promovojmë bashkëjetesën harmonike mes qytetërimeve dhe mirëkuptimin mes popujve të të gjithë botës.
Sipas tij, Kina do të qëndrojë e palëkundur në anën e drejtë të historisë dhe përparimit të qytetërimit njerëzor, së bashku me vendet e tjera. Vendi do t’i përmbahet multilateralizmit dhe do të zbatojë në mënyrë aktive Iniciativën Globale të Qytetërimit. Gjithashtu do të promovojë frymën e “Rrugës së Mëndafshit”, do të nxisë ndërtimin me cilësi të lartë të nismës “Një Brez, një Rrugë”, dhe do t’i përkushtohet forcës nxitëse për zhvillimin dhe progresin e qytetërimit njerëzor.
Të ftuarit pjesëmarrës si Kryetari i Asamblesë Kombëtare të Botsvanës, Dithapelo Keorapetse, Nënkryetari i Asamblesë Kombëtare të Laosit, Soma Benshena dhe ish-Presidentja e Nepalit, Bidya Devi Bhandari, thanë se aktualisht bota po përjeton konflikte të ndryshme ndaj qeverisja globale po përballet me sfida të mëdha. Kina i ka ofruar botës stabilitet dhe siguri me zhvillimin e saj. Duke promovuar frymën e “Rrugës së Mëndafshit” dhe duke nxitur ndërtimin e nismës “Një Brez, një Rrugë”, Kina ka mbështetur fuqimisht zhvillimin ekonomik dhe shoqëror të vendeve në zhvillim. Presidenti Xi Jinping propozoi tre iniciativa globale, përfshirë Iniciativën Globale të Qytetërimit, të cilat jo vetëm ndihmojnë në rritjen e mirëkuptimit të shkëmbimeve apo në mësimin e ndërsjellë mes qytetërimeve, por gjithashtu hedhin themele të forta për ndërtimin e një rendi të ri ndërkombëtar, pro bashkëjetesës harmonike dhe bashkëpunimit midis vendeve të botës.
Në takim morën pjesë rreth 400 udhëheqës të partive politike, ekspertë dhe studiues, drejtues të organizatave ndërkombëtare dhe atyre joqeveritare, si dhe përfaqësues të departamenteve përkatëse kineze./cgtn
