Ministri i Jashtëm Wang Yi theksoi të premten çështjen e Tajvanit dhe përsëriti politikën e “një Kine”, gjatë një bisede telefonike me homologun francez Jean-Noel Barrot. Ai gjithashtu shprehu kundërshtim të fortë ndaj ndërhyrjes së NATO-s në çështjet e Azi-Paqësorit.
Wang, tha se Kina dhe Franca, si dy palë që mbështesin një traditë pavarësie dhe autonomie, duhet të forcojnë besimin e ndërsjellë strategjik dhe të respektojnë interesat thelbësore të njëra-tjetrës.
Ai theksoi se çështja e Tajvanit është një çështje e brendshme e Kinës që ka të bëjë me sovranitetin kombëtar dhe tërësinë territoriale të vendit, i cili është krejtësisht i ndryshëm nga çështja e Ukrainës. Kina i kushton rëndësi të madhe angazhimit të Francës ndaj politikës së “një Kine”, tha ai, duke shtuar se Kina beson se Franca do ta kthejë këtë angazhim në praktikë.
Wang gjithashtu shprehu shpresën e Kinës se Franca do të mbajë qëndrimin e duhur dhe do të kundërshtojë ndërhyrjen e NATO-s në çështjet e Azi-Paqësorit, duke theksuar se të dy vendet duhet të mbështesin së bashku multilateralizmin dhe të mbrojnë tregtinë e lirë, duke kundërshtuar praktikat e njëanshme të ngacmimit.
Më 22 maj, Presidenti i Kinës Xi Jinping zhvilloi një telefonatë me homologun e tij francez, Emmanuel Macron. Të dyja palët arritën një konsensus të rëndësishëm mbi forcimin e koordinimit strategjik mes dy vendeve.
Për të zbatuar konsensusin, Wang tha se të dyja palët duhet të bëjnë përgatitje për shkëmbime në të gjitha nivelet në fazën tjetër. Kina mirëpret përfaqësuesit e lartë francezë në Konferencën Botërore të Inteligjencës Artificiale në Shangai në vitin 2025.
Duke vënë në dukje se të dyja palët kanë arritur konsensus mbi zgjidhjen e çështjeve ekonomike dhe tregtare përmes dialogut dhe konsultimit, Wang theksoi nevojën për të rritur shkëmbimet njerëzore, kulturore dhe arsimore midis dy vendeve, në mënyrë që të promovohet zhvillimi i shëndoshë i partneritetit strategjik gjithëpërfshirës Kinë-Francë dhe i marrëdhënieve Kinë-BE.
Nga ana e tij, Barrot tha se zv/Presidenti Han Zheng është i mirëpritur të marrë pjesë në Konferencën e Oqeanit të OKB-së në Francë. Ai vuri në dukje se marrëdhëniet Francë-Kinë po bëhen gjithnjë e më të rëndësishme për botën e sotme mes pasigurisë në rritje.
Franca gjithmonë e konsideron Kinën si një mik dhe partner, i përmbahet fort politikës së “një Kine” dhe pret me padurim ruajtjen e shkëmbimeve të nivelit të lartë dhe komunikimit të ngushtë strategjik me Kinën, tha ai.
Forcimi i shkëmbimeve njerëzore dhe kulturore midis dy palëve do të dërgojë një sinjal të fortë hapjeje, gjë që është me rëndësi të madhe aktualisht, tha Barrot. Ai shtoi se Franca kundërshton luftërat tregtare dhe ato tarifore, si edhe është e gatshme të vazhdojë të zgjidhë siç duhet fërkimet ekonomike dhe tregtare përmes konsultimeve.
Të dyja palët shkëmbyen gjithashtu pikëpamje mbi çështjet që kanë të bëjnë me Ukrainën, Palestinën dhe Izraelin, si dhe programin bërthamor të Iranit./cgtn
