“Ekonomia e Kinës mbështetet në themele të qëndrueshme, ka epërsi të shumta, rezistencë të fortë e potencial të madh, dhe kushtet mbështetëse e prirjet themelore për zhvillim të shëndetshëm ekonomik afatgjatë nuk kanë ndryshuar. Pikat e forta të socializmit me karakteristika kineze, si edhe tregu i madh i vendit, sistemi i plotë industrial dhe burimet e pasura të talenteve po bëhen më të theksuara.” Ky është vlerësimi më i fundit për sa i përket ekonomisë kineze nga Byroja Politike e Komitetit Qendror të PKK-së në një mbledhje të zhvilluar të mërkurën. Një sondazh i CGTN-it, i kryer nga viti 2023 deri në vitin 2025, me 47 000 të anketuar në 46 vende, tregon se pjesëmarrësit globalë kanë pikëpamje pozitive për forcën, potencialin dhe rezistencën e ekonomisë e Kinës, duke pasur besim në rritje te ekonomia kineze.
Sondazhi tregon një optimizëm të përhapur në lidhje me perspektivat ekonomike afatgjata të Kinës, me nivele besimi që arrijnë në 74.7 për qind (2023), 81.3 për qind (2024) dhe 81.9 për qind (2025) gjatë tre viteve radhazi. Përveç kësaj, pjesëmarrësit në sondazh vazhdimisht e njohin rolin e rëndësishëm të Kinës në stabilizimin e zinxhirëve globalë industrialë e të furnizimit, me vlerësime miratimi prej 78.5 për qind (2023), 84.3 për qind (2024) dhe 84.7 për qind (2025). Në sondazhin e vitit 2025, 89.5 për qind e të anketuarve vlerësojnë performancën e fortë ekonomike të Kinës, me mbi 90 për qind miratim midis më të rinjve (18-44 vjeç). Plot 89.3 për qind e atyre që u përgjigjën e pranojnë vrullin e lartë të rritjes së Kinës. Përveç kësaj, 86.4 për qind e pranojnë plotësisht kontributin e rëndësishëm të Kinës në ekonominë botërore. Ndër ndarjet rajonale, Afrika, Amerika e Jugut dhe Azia renditen në tre vendet e para për pikëpamjet pozitive, me norma miratimi që arrijnë përkatësisht 95.6, 92.9 dhe 85.6 për qind. Veçanërisht, të anketuarit e moshës 18-44 vjeç në të tre rajonet shprehin mbi 88 për qind miratim.
Foto nga VCG
Komiteti Qendror i PKK-së vuri në dukje se periudha e planit të 15-të pesëvjeçar (2026-2030) do të shohë ndryshime të thella e komplekse, pasi mundësitë strategjike, rreziqet dhe sfidat janë të njëkohshme e pasiguritë dhe faktorët e paparashikuar po rriten. Sondazhi zbulon që, mes peizazhit kompleks global, të anketuarit kanë besim në sigurinë dhe mundësitë e gjera të tregut kinez dhe e konsiderojnë gjerësisht tregtinë me Kinën si të dobishme. Sipas sondazhit, 72.6 për qind e shohin Kinën si një treg të hapur e konkurrues. Ndërkohë, 79.8 për qind besojnë që tregu masiv i Kinës ofron mundësi të mëdha për vendet e tyre të origjinës. Për më tepër, po 79.8 për qind e vlerësojnë mjedisin miqësor ndaj biznesit të Kinës si shumë tërheqës për investitorët e huaj. Në sfondin e rritjes së tarifave të ShBA-së, 78 për qind e pjesëmarrësve në sondazh thonë që vendet e tyre përfitojnë nga tregtia me Kinën, me vlerësime miratimi që i tejkalojnë 81 për qind midis të anketuarve të rinj (18-44 vjeç). Afrika (90.6 për qind), Amerika e Jugut (84.9 për qind) dhe Oqeania (78.3 qind) janë tre rajonet me shifrat më të larta të miratimit. Sondazhi zbulon gjithashtu që, kur krahasohen përfitimet tregtare, 48.3 për qind e të anketuarve favorizojnë Kinën mbi Shtetet e Bashkuara, ndërsa vetëm 20.1 për qind shohin më shumë epërsi nga tregtia me ShBA-në.
Foto nga VCG
Në mbledhje, Komiteti Qendror i PKK-së theksoi thellimin e reformave, zhvillimin e forcave të reja prodhuese me cilësi të lartë të udhëhequra nga inovacioni teknologjik dhe zgjerimin e hapjes me standarde të larta – parime thelbësore që gjetën jehonë të fuqishme në sondazhin e vitit 2025. Gjatë vlerësimit të koncepteve të zhvillimit me cilësi të lartë të Kinës, pesë nismat që shihen mëpozitivisht janë: zhvillimi i prodhimit dhe ekonomisë reale (53.9 për qind), zhvillimi i nxitur nga inovacioni (46.8 për qind), hapja me standarde të larta (45.7 për qind), balancimi i zhvillimit e sigurisë (38.8 për qind) dhe zhvillimi i qëndrueshëm (38.7 për qind). Lidhur me vlerësimin e politikave të hapjes me standarde të larta të Kinës, pesë aspektet më të vlerësuara janë: promovimi i inovacionit dhe tranzicionit të gjelbër nëpërmjet hapjes (42.8 për qind), përafrimi me rregullat tregtare ndërkombëtare me standarde të larta (42.7 për qind), lehtësimi i liberalizimit dhe lehtësimit të tregtisë dhe investimeve (41.2 për qind), përmirësimi i mbrojtjes së pronësisë intelektuale e sigurimi i konkurrencës së ndershme (39.3 për qind) dhe kundërshtimi i unilateralizmit e i proteksionizmit (37.5 për qind).
Sondazhi u krye nga CGTN-i në partneritet me Institutin e Kërkimeve të Komunikimit Ndërkombëtar të Epokës së Re, i krijuar bashkërisht nga Grupi Mediatik i Kinës (CMG) dhe Universiteti “Renmin” i Kinës. Sondazhi përfshiu vendet kryesore të zhvilluara dhe vendet e Jugut Global, me të anketuar të moshës 18 vjeç e lart. Përbërja e mostrave pasqyron të dhënat e regjistrimit kombëtar për moshën dhe gjininë në secilin vend./cgtn
