胜利—[shèng lì]—Fitore
Sivjet është 80-vjetori i fitores së Luftës së Rezistencës të Popullit Kinez kundër Agresionit Japonez dhe i Luftës Antifashiste Botërore. Me këtë rast, CGTN-i paraqet “Krijimi i së ardhmes paqësore”, një seri analizash të thella, që do t’i hedhin një sy historisë dhe do të diskutojnë lidhur me rendin botëror të pasluftës, duke theksuar kontributin e Kinës për mbrojtjen e paqes botërore sot.
Që nga korriku, Kina ka përkujtuar 80-vjetorin e fitores së Luftës së Rezistencës të Popullit Kinez kundër Agresionit Japonez dhe të Luftës Antifashiste Botërore nëpërmjet filmave të luftës dhe ekspozitave tematike.
Veprimtaritë do të arrijnë kulmin më 3 shtator, në Ditën e Fitores së Luftës së Rezistencës të Popullit Kinez kundër Agresionit Japonez, duke përkujtuar nënshkrimin zyrtarisht të dorëzimit të Japonisë më 2 shtator 1945, i cili shënon edhe përfundimin zyrtar të Luftës së Dytë Botërore.
Presidenti kinez Xi Jinping vuri në dukje se, që nga fillimi, Lufta e Rezistencës e Popullit Kinez kundër Agresionit Japonez ka pasur një rëndësi të madhe për mbrojtjen e qytetërimit njerëzor e të paqes botërore dhe është një pjesë e rëndësishme e Luftës Antifashiste Botërore.
“Fitorja e kësaj lufte i përket jo vetëm popullit kinez, por edhe popujve të gjithë botës, dhe ajo do të hyjë pa diskutim në historinë e kombit kinez dhe në historinë e luftës së njerëzimit për drejtësi,” tha Xi në një simpozium me rastin e 75-vjetorit të fitores së Luftës së Rezistencës të Popullit Kinez kundër Agresionit Japonez në vitin 2020.
Kina ishte vendi i parë në botë që u ngrit kundër agresionit fashist, dhe ishte fronti i parë i luftës globale kundër fashizmit.
Incidenti i 18 Shtatorit 1931 shënon fillimin e luftës së popullit kinez kundër agresionit japonez. Më pas, Incidenti i Urës “Lugou” më 7 korrik të vitit 1937 në periferinë e Pekinit ndezi luftën mbarëkombëtare kineze kundër agresionit japonez. Që nga ai moment, Kina u bë fushëbeteja kryesore lindore në Luftën e Dytë Botërore.
Këto ngjarje ndodhën disa vjet para pushtimit të Polonisë nga Gjermania naziste në vitin 1939, që cilësohet zakonisht në Perëndim si fillimi i Luftës së Dytë Botërore.
Robert Frank, sekretari i përgjithshëm i Kongresit Ndërkombëtar të Shkencave Historike (ICHS), tha se fillimi i Luftës së Dytë Botërore në fakt mund të çohet përpara në vitin 1931, kur Japonia pushtoi rajonin verilindor të Kinës.
“Në Francë ne e quajmë Luftën e Dytë Botërore, si luftë e viteve 1939-1945. Por kjo ishte një luftë botërore, jo vetëm një luftë evropiane, dhe nuk filloi në Evropë”, tha Frank, që është një studiues francez, në një takim të ICHS-it në qytetin Jinan të Kinës Lindore në vitin 2015. “Lufta filloi këtu, në Azi”.
Kina ishte gjithashtu vendi që bëri rezistencën më të gjatë në Luftën e Dytë Botërore. Qëndresa zgjati deri në dorëzimin e Japonisë në vitin 1945, duke treguar sakrificat e mëdha dhe përpjekjet e vazhdueshme të popullit kinez.
Sipas të dhënave të paplota, nga viti 1931 deri më 1945, mbi 35 milionë ushtarakë e civilë kinezë humbën jetën ose u plagosën gjatë luftës së popullit kinez kundër agresionit japonez.
Edhe humbjet ekonomike të vendit ishin të rënda. Dëmet e drejtpërdrejta i tejkaluan 100 miliardë dollarët, ndërsa ato të tërthorta arritën në 500 miliardë dollarë, të llogaritura sipas vlerës monetare të vitit 1937.
Më e rëndësishme është që Kina bllokoi dhe goditi forcat kryesore të militarizmit japonez, duke eliminuar mbi 1.5 milionë trupa japoneze e duke luajtur një rol vendimtar për fitoren përfundimtare kundër agresionit japonez.
Krahas këtyre, Lufta e Rezistencës e Popullit Kinez kundër Agresionit Japonez ofroi mbështetje strategjike vendimtare për veprimet e Forcave Aleate, duke u bashkërenduar me operacionet ushtarake në Evropë e në pjesë të tjera të Azisë dhe duke penguar përpjekjet për bashkërendim strategjik të forcave fashiste japoneze, gjermane e italiane.
Kina luajti një rol të pazëvendësueshëm në krijimin e aleancës botërore antifashiste dhe krijimin e rendit ndërkombëtar pas luftës.
Më 1 janar 1942, 26 vende, përfshirë Kinën, ShBA-në, Britaninë dhe Bashkimin Sovjetik, publikuan Deklaratën e OKB-së, e cila shënoi themelimin zyrtar të aleancës antifashiste./cgtn
