Në përfundim të Samitit të Planit të Rritjes së BE-së “Our Pathway to the EU”, kryeministri Edi Rama dhe Komisionerja për Zgjerimin Marta Kos zhvilluan një konferencë të përbashkët për shtyp, ku theksuan përparimin e Shqipërisë drejt integrimit dhe rëndësinë e zbatimit të reformave të mbetura. Rama deklaroi se samiti prodhoi hapa konkret që afrojnë rajonin me tregun e përbashkët europian, duke përfshirë marrëveshjen e re të roaming-ut me BE-në, zgjerimin e identitetit dixhital që pritet të zbatohet në fillim të vitit 2025, lehtësimin e tregtisë kufitare, përmirësimin e korridoreve europiane dhe nxitjen e bashkëpunimit në turizëm e arsimin e lartë.
Komisionerja Kos vlerësoi angazhimin e Shqipërisë dhe të rajonit, duke e cilësuar progresin në drejtësi dhe luftën kundër korrupsionit si “të paprecedentë” në dy vitet e fundit. Ajo theksoi se BE-ja synon integrimin e vendeve të Ballkanit Perëndimor në sa më shumë politika europiane përpara anëtarësimit të plotë dhe kërkoi përshpejtimin e reformave përpara afatit të qershorit 2025. Sa i përket zgjedhjeve të 11 majit, Kos i cilësoi ato “të lira dhe të ndershme”, duke shtuar se sugjerimet për përmirësim janë pjesë e procesit normal demokratik.
Pyetjet politike u përqendruan te çështja e pezullimit nga detyra të zv.kryeministres Belinda Balluku. Rama e cilësoi vendimin e gjykatës si “unik në historinë e Europës” dhe si ndërhyrje të drejtpërdrejtë në pavarësinë e ekzekutivit, por u shpreh se qeveria do ta respektojë plotësisht vendimin, duke ia lënë Gjykatës Kushtetuese fjalën e fundit. Ai theksoi se qeveria nuk do të ketë zëvendëskryeministër deri në vendimin e Kushtetueses, ndërsa mbrojti parimin e pavarësisë së drejtësisë dhe nevojën për të shmangur përplasjet politike me institucionet e reja të sistemit.
“Mbrojtja e pavarësisë së re dhe jo të përkohshme të sistemit të drejtësisë është prioriteti absolut edhe përballë situatave kaq flagrante sa kjo situatë, për të cilën po drejtësia duhet të gjejë përgjigjen kushtetuese”, tha Rama.
“Këta jemi ne, ky jam unë dhe kështu do të jetë deri në fund kur unë të kem privilegjin që të udhëheq Shqipërinë për ta bërë anëtare të Bashkimit Europian”, deklaroi Rama.
Kreu i qeverisë u shpreh se “nëse sot Shqipëria i ka hapur të gjithë kapitujt e negociatave për anëtarësim ndër disa arsye themelore është edhe fakti se Shqipëria po e lufton seriozisht korrupsionin dhe krimin e organizuar”.
“Pa diskutim që sot edhe fakti që mund të bëhen pyetje me këtë përmbajtje lidhet me një epokë të re ku kemi hyrë. Në këtë epokë të re Shqipërinë e ka futur kjo shumicë qeverisëse, me mua në krye”, u shpreh Rama, duke iu referuar pyetjes së gazetares për Ballukun.
Më tej, Rama tha se “së pari, pavarësia e gjyqësorit nuk është as slogan, as manovër politike dhe as eksperiment i përkohshëm, por është një shkëputje historike nga e kaluara, e realizuar vetëm në vitet e fundit. Kjo pavarësi ka sjellë një risi absolute në jetën institucionale të Shqipërisë dhe zhvillime të padiskutueshme pozitive, duke filluar nga një fakt i pamohueshëm varrosja e kulturës 100 e kusur vjeçare të pandëshkueshmërisë”.
Por, vijoi Kryeministri, ama ka shfaqur edhe dobësitë e natyrshme të një pushteti krejt të ri fëminor për nga mosha, si dhe reflekse të vjetra antidemokratike.
“Së dyti, dua të theksoj se pavarësisht dhe përtej kostove të larta që kanë për vendin dhe jo thjesht për ne këto reflekse të vjetra antidemokratike të trupave të reja speciale, për ne dhe për mua personalisht mbrojtja e pavarësisë dhe ruajtja e pavarësisë së sistemit të drejtësisë janë parakushte për çdo qëndrim nga ana jonë, sepse siç thotë edhe një fjalë e mençur që mua më pëlqen shumë: “Kurrë nuk duhet hedhur fëmija bashkë me ujin e pistë””, theksoi Rama.
Kryeministri Rama tha se, “pezullimi nga detyra i një ministri, në këtë rast edhe zv.kryeministres drejtpërdrejt përgjegjëse për drejtimin e qeverisë në mungesë të Kryeministrit është një tjetër shfaqje e pikërisht atyre dobësive që përmenda më lart dhe një pushteti krejt të ri dhe e reflekseve antidemokratike që përmenda po ashtu më lart”.
“Ky është një rast unikal në historinë e Europës dhe po ashtu në historinë e trupave speciale të drejtësisë që janë krijuar në proceset e integrimit europian të vendeve të ish-Lindjes komuniste, ku s’ka ndodhur kurrë që një prokuror dhe një gjykatës të mblidhen kokë më kokë dhe të pezullojnë nga detyra një anëtar qeverie. Por, nëse një prokuror special dhe një gjykatës special i Shkallës së Parë të Speciales këtu në Shqipëri kanë vendosur të pezullojnë një ministër, cenimi i drejtpërdrejtë i pavarësisë dhe funksionimit të një pushtetit tjetër të pavarur siç është ekzekutivi, duke marrë kompetencat e kryeministrit, Presidentit dhe të Parlamentit – prej nga buron mandati i qeverisë dhe çdo ministri – zgjedhja jonë në raport me këtë fakt është strategjikja, si gjithmonë për ta ruajtur dhe mbështetur pavarësinë e gjyqësorit si parakusht edhe në këtë rast ekstrem”, nënvizoi Rama.
E thënë drejtpërdrejt, shtoi Kryeministri, “ne nuk mund t’i përgjigjemi një arbitrariteti të këtyre përmasave me asnjë lloj arbitrariteti dhe as nuk të angazhohemi, larg qoftë, në një betejë politike, retorike me drejtësinë”.
“Por, ne do të vazhdojmë me durimin tonë strategjik”, tha kryeministri Rama.
Komisionerja Kos nuk komentoi rastin konkret, por vuri në dukje se respektimi i vendimeve të gjykatave dhe funksionimi i një sistemi të pavarur gjyqësor janë thelbësore për procesin e integrimit. Rama në mbyllje theksoi se Shqipëria do të vijojë mbështetjen për drejtësinë e pavarur, por paralajmëroi se shkelja e kufijve mes pushteteve cenon rendin kushtetues dhe standardet europiane që vendi synon të përqafojë.
“Ajo që mund të them është që një sistem i pavarur gjyqësor është një nga arritjet më të mëdha të Shqipërisë gjatë viteve të fundit”, shtoi Kos.
Komisionerja për Zgjerimin vlerësoi se Shqipëria ka pasur një ecuri të rëndësishme në luftën kundër korrupsionit.
“Këto ne i kemi pasur edhe si pjesë të gjetjeve tona dhe e kemi bërë edhe pjesë të raportit të Zgjerimit. Ajo që ka ndodhur gjatë viteve të fundit në Shqipëri në fushën e sundimit të ligjit, mbrojtjes së qytetarëve dhe të sektorit të biznesit është e paprecedent”, tha Kos.
Sipas saj, ajo që BE do nga çdo vend kandidat është që të ketë një sistem ku me ndihmën e sistemit gjyqësor do të ketë siguri ligjore, që në rast se dikujt i dhunohen të drejtat, ka gjykata dhe ka gjykatës që do të kujdesen për këtë çështje.
“Raste të tilla ndodhin gjithandej, por e rëndësishme është që ne të ndjekim vendimet e gjykatës dhe kjo është ajo që kam dëgjuar nga Kryeministri që do të ndodhë”, tha Komisionerja Kos
© 2025 Argumentum
