Ambasadorja e Ukrainës në Shtetet e Bashkuara të Amerikës, Olha Stefanishyna, ka përjashtuar në mënyrë të prerë çdo diskutim lidhur me ndryshimin e kufijve të Ukrainës, teksa i është përgjigjur planit të paqes të propozuar nga SHBA-ja për t’i dhënë fund luftës së nisur nga Rusia gati katër vite më parë.
“Integriteti territorial i Ukrainës dhe ndryshimi i kufijve ukrainas nuk është diçka që duhet të diskutohet në tryezën e bisedimeve”, deklaroi Stefanishyna mbrëmjen e djeshme, duke nënvizuar se Kievi është i hapur vetëm për të diskutuar në mënyrë të detajuar vijën e kontaktit midis forcave—çështje që, sipas saj, deri tani nuk ka qenë pjesë e dialogut.
Gjatë muajve të fundit, Ukraina dhe vendet evropiane kanë bërë përpjekje për një armëpushim përgjatë vijave aktuale të frontit si hap të parë drejt çdo marrëveshjeje paqeje. Megjithatë, Moska nuk është tërhequr nga objektivat e saj të luftës.
Plani i ri amerikan prej 28 pikësh, i zbuluar këtë javë dhe i paraqitur zyrtarisht Kievit, parashikon që Ukraina të bëjë lëshime të mëdha territoriale, përfshirë tërheqjen e trupave nga zonat e kontestuara të rajoneve Luhansk dhe Donetsk, të cilat aktualisht janë nën kontrollin e forcave ruse. Më tej, SHBA-ja pritet të njohë Krimenë e aneksuar në mënyrë të paligjshme në vitin 2014, si dhe rajonet e Donetskut dhe Luhanskut, si territore de facto ruse.
Sipas propozimit, Ukraina do të duhet të heqë dorë nga synimi për anëtarësim në NATO përmes një dekreti kushtetues dhe të kufizojë ushtrinë e saj në 600,000 trupa. Në këmbim, SHBA-ja do të ofronte garanci sigurie dhe do të mbështeste integrimin e Ukrainës në Bashkimin Evropian.
Stefanishyna i cilësoi 28 pikat e planit të administratës Trump si të përputhshme me kërkesat e Moskës. Një qëndrim të ngjashëm e përsëriti edhe i dërguari i Ukrainës në OKB në mbledhjen e djeshme të Këshillit të Sigurimit, i cili diskutoi situatën e luftës.
Presidenti amerikan Donald Trump sugjeroi një afat deri të enjten, 27 nëntor, që qeveria ukrainase të japë përgjigje për planin e ri të paqes. “Kam pasur shumë afate, por nëse gjërat po funksionojnë, zakonisht afatet zgjaten. Por e enjta mendohet të jetë kohë e përshtatshme”, deklaroi ai në Fox News Radio.
Presidenti i Ukrainës, Volodymyr Zelensky, i cili u njoh dje me planin, tha se dokumenti e vendos vendin e tij përballë një zgjedhjeje shumë të vështirë: “ose humbje dinjiteti, ose rrezik për të humbur një partner kyç”, duke iu referuar kështu Shteteve të Bashkuara. Megjithatë, Zelensky theksoi se Kievi do të punojë ngushtë me Uashingtonin për të gjetur zgjidhje dhe për të eksploruar alternativa të tjera.
Në anën tjetër, Presidenti rus, Vladimir Putin, deklaroi sot se plani i propozuar nga SHBA-ja “mund të shërbejë si bazë për një zgjidhje përfundimtare” të konfliktit, por paralajmëroi se Rusia mund të shtrihet më tej nëse Kievi e refuzon atë. “Ne jemi të gatshëm të bëjmë negociata paqësore dhe të zgjidhim problemet me mjete paqësore. Megjithatë, kjo kërkon një diskutim të thelluar të të gjitha detajeve të planit të propozuar”, tha Putin gjatë një takimi qeveritar të transmetuar në televizion, duke theksuar se propozimi amerikan nuk është diskutuar ende “në mënyrë konkrete” me Rusinë.
/Argumentum.al
