Ministria kineze e Mbrojtjes e paralajmëroi të enjten Japoninë që, në qoftë se e kalon vijën e kuqe për sa i përket rajonit të Tajvanit dhe krijon probleme për veten, do të paguajë një çmim të rëndë.
Ushtria Çlirimtare Popullore ka aftësi të forta dhe mjete të besueshme për të mundur çdo agresor, tha zëdhënësi i Ministrisë së Mbrojtjes të Kinës Jiang Bin në përgjigje të një pyetjeje rreth planit japonez për të vendosur raketa tokë-ajër me rreze të mesme në ishullin Yonaguni, rreth 110 kilometra në lindje të rajonit të Tajvanit të Kinës.
Ky qëndrim i rrezikshëm, paralajmëroi Jiang, do të shkatërrojë rendin ndërkombëtar të pas-Luftës së Dytë Botërore dhe do ta bëjë Japoninë të përsërisë gabimet e së kaluarës së saj militariste.
“Çështja e Tajvanit është thjesht një punë e brendshme e Kinës dhe mënyra e zgjidhjes së saj nuk ka të bëjë aspak me Japoninë,” theksoi Jiang.
“Ne i kërkojmë palës japoneze të shprehë plotësisht pendesë për krimet e saj të luftës dhe të braktisë menjëherë përpjekjet e rrezikshme. Çdo përpjekje për të përsëritur rrugën djallëzore të agresionit e ekspansionit dhe për të dëmtuar rendin ndërkombëtar të pas-Luftës Dytë Botërore nuk do të ketë sukses,” tha ai.
Po të enjten, edhe zëdhënësja e Ministrisë së Jashtme ruse Maria Zakharova i dënoi në një konferencë për shtypin planet e Japonisë, duke deklaruar se vendosja e armëve sulmuese në ishujt përreth Japonisë do të dëmtonte sigurinë dhe qëndrueshmërinë rajonale, duke përbërë një kërcënim të madh për vendet fqinje.
Zakharova tha se Rusia po e mbikëqyr nga afër përpjekjen e Japonisë për rimilitarizim dhe e ka paralajmëruar vazhdimisht Tokion nëpërmjet kanaleve diplomatike. Ajo shtoi se Rusia është kundër vendosjes së raketave me rreze të mesme nga Japonia me çfarëdo preteksti apo në çfarëdo forme dhe ruan të drejtën të përgjigjet ashpër ndaj planeve të palës japoneze për vendosjen e raketave në ishullin Yonaguni./CGTN
