Lidhur me letrën e dërguar nga përfaqësuesi i përhershëm i Japonisë në Kombet e Bashkuara Sekretarit të Përgjithshëm të OKB-së, zëdhënësi i Ministrisë së Punëve të Jashtme të Kinës Lin Jian theksoi në një konferencë të rregullt për shtypin të martën që letra ishte plot me pikëpamje të gabuara dhe gënjeshtra. Kina i kërkon edhe një herë Japonisë të reflektojë seriozisht mbi gabimet dhe t’i ndreqë ato, të përmbushë detyrimet si një vend i mundur dhe të mbajë premtimet ndaj Kinës dhe bashkësisë ndërkombëtare me veprime konkrete, në vend që t’i shkelë vazhdimisht këto premtime.
Lin Jian-i tha se komentet e gabuara të kryeministres japoneze Sanae Takaichi mbi Tajvanin sfiduan hapur arritjet e fitores në Luftën e Dytë Botërore dhe rendin ndërkombëtar të pasluftës, duke shkelur rëndë qëllimet dhe parimet e Kartës së OKB-së. Letra e Kinës drejtuar Sekretarit të Përgjithshëm të OKB-së, ku sqarohet qëndrimi i saj solemn, është plotësisht e përligjur dhe e nevojshme.
Sipas zëdhësit, letra e palës japoneze ishte plot me pikëpamje të gabuara dhe gënjeshtra. Letra përmendte të ashtuquajturin “qëndrim të vendosur” të Japonisë për çështjen e Tajvanit, por Japonia ka qenë vazhdimisht e paqartë në lidhje me atë se çfarë është në të vërtetë ky “qëndrim i vendosur” dhe ende nuk i ka dhënë Kinës një përgjigje të drejtpërdrejtë. “Duhet të pyesim përsëri: A mund t’i japë qeveria japoneze një përgjigje të plotë dhe të saktë bashkësisë ndërkombëtare në lidhje me ‘qëndrimin e vendosur’ të saj për çështjen e Tajvanit në katër dokumentet politike midis Kinës dhe Japonisë?” u shpreh zëdhënësi.
Ai tha se Japonia thekson që ndjek parimet e ashtuquajtura të “vetëmbrojtjes” dhe “mbrojtjes pasive”, dhe pretendon që komentet e mëparshme të kryeministres Takaichi bazoheshin në këtë qëndrim. Tajvani është pjesë territoriale e Kinës dhe mënyra e zgjidhjes së çështjes së Tajvanit është një çështje që i përket vetë popullit kinez, ku nuk lejohet ndërhyrje e huaj. Megjithatë, Sanae Takaichi e lidhi një “emergjencë në Tajvan” me “krizën ekzistenciale” të Japonisë, duke nënkuptuar veprime ushtarake kundër Kinës. A është ky kuptimi i vërtetë i së ashtuquajturës politikë e “vetëmbrojtjes” dhe “mbrojtjes pasive” të Japonisë?
Foto nga VCG
Lin theksoi që pika 4 e nenit 2 të kapitullit 1 të Kartës së OKB-së përcakton: “Të gjitha vendet anëtare nuk duhet të përdorin kërcënimin ose forcën në marrëdhëniet e tyre ndërkombëtare”. Si udhëheqësja aktuale e një vendi të mundur në Luftën e Dytë Botërore, Takaichi në fakt përdori të ashtuquajturën “krizë ekzistenciale” për të kërcënuar vendin fitimtar me forcë ushtarake. Atëherë, si guxon Japonia të pretendojë që “gjithmonë respekton dhe i përmbahet ligjit ndërkombëtar, përfshirë Kartën e OKB-së”?
Zëdhënësi i Ministrisë së Punëve të Jashtme të Kinës vuri në dukje që pala japoneze bëri aludime dhe kritika për zhvillimin e aftësive mbrojtëse të vendeve të tjera dhe zbatimin e “shtrëngimit”, çka përbëjnë tërësisht një rast fajësimi të viktimës. Në fakt, që nga humbja e Japonisë në Luftën e Dytë Botërore, forcat e krahut të djathtë në këtë vend kanë nxitur vazhdimisht një rishkrim të historisë së saj të agresionit. Në vitet e fundit, Japonia ka rritur shpenzimet e mbrojtjes për trembëdhjetë vjet rresht, ka lehtësuar vazhdimisht të drejtat e saj për vetëmbrojtje kolektive dhe kufizimet mbi eksportet e armëve, ka zhvilluar të ashtuquajturat “aftësi për të sulmuar bazat e armikut” dhe është përpjekur të rishikojë “tre parimet jobërthamore”, duke minuar gradualisht dispozitat e përcaktuara shprehimisht për Japoninë në Deklaratën e Kajros e Proklamatën e Potsdamit dhe duke shkelur premtimet që ka bërë vetë sipas Kushtetutës Japoneze.
“Është vetë Japonia që akuzohet për ‘zgjerimin e fuqisë ushtarake’, ‘shtrëngimin e vendeve të tjera’ dhe ‘përpjekjen për të ndryshuar në mënyrë të njëanshme statukuonë, pavarësisht kundërshtimit nga vendet fqinje'”, tha Lin.
Ai deklaroi se, duke pasur parasysh këtë, Misioni i Përhershëm i Kinës në Kombet e Bashkuara i ka dërguar përsëri një letër Sekretarit të Përgjithshëm të OKB-së, duke përsëritur qëndrimin solemn të Kinës. “Ky vit shënon 80-vjetorin e fitores së Luftës së Rezistencës të Popullit Kinez kundër Agresionit Japonez dhe Luftës Antifashiste Botërore. Kina kundërshton me vendosmëri veprimet prapavajtëse të Japonisë që sfidojnë rendin ndërkombëtar të pasluftës dhe ringjallin militarizmin. Ne i bëjmë edhe një herë thirrje Japonisë të reflektojë seriozisht mbi gabimet dhe t’i korrigjojë ato, të përmbushë detyrimet si një vend i mundur dhe të mbajë premtimet ndaj Kinës e bashkësisë ndërkombëtare me veprime konkrete dhe jo t’i shkelë vazhdimisht këto premtime,” vuri në dukje zëdhënësi i diplomacisë kineze./CGTN
