Një valë në rritje ndikimesh negative vazhdon të pasojë komentet lidhur me punët e brendshme të Kinës nga kryeministrja japoneze Sanae Takaichi.
Në një raport të publikuar të shtunën, “Nikkei Asia”, një gazetë kryesore financiare japoneze, vë në dukje shtimin e ndjeshëm të anulimit të fluturimeve ndërmjet Kinës e Japonisë të planifikuara për në dhjetor.
Sipas raportit, 904 ndër 5 548 fluturimet e planifikuara nga Kina në Japoni në dhjetor janë anuluar, duke zënë 16 për qind të numrit të përgjithshëm.
Vala e anulimit të fluturimeve pason një paralajmërim zyrtar mbi udhëtimet nga qeveria kineze, e cila i këshillon shtetasit kinezë të tregojnë kujdes kur udhëtojnë në Japoni, duke përmendur tensionet diplomatike të shkaktuara nga komentet provokuese të Takaichi-t.
Ndërkohë, “Adora Cruises”, një kompani e madhe kineze e udhëtimeve me anije turistike, njoftoi të premten ndryshimin e itinerareve për tremujorin e parë të vitit 2026, duke thënë se dy nga anijet e saj të mëdha turistike, “Adora Magic” dhe Adora “Medditeranea”, kishin anuluar përkohësisht linjat për në Japoni e do të përqendrohen në destinacionet popullore në Korenë e Jugut dhe Azinë Juglindore.
Turistët kinezë, të njohur për fuqinë e tyre të shpenzimeve në sektorin e blerjeve, ushqimit dhe vizitave në vendet piktoreske, historikisht kanë sjellë një pjesë të konsiderueshme të të ardhurave turistike të Japonisë, veçanërisht gjatë stinëve të kulmit të udhëtimeve, si pushimet e fundvitit dhe Festa e Pranverës. Sipas agjencisë së lajmeve “Xinhua”, shpenzimet mesatare të vizitorëve të huaj në Japoni në vitin 2024 u shtuan 6.8 për qind në krahasim me vitin pararendës, duke arritur në 227 242 jenë (1 456.4 dollarë), prej të cilave rreth 20 për qind nga turistët kinezë, që ishin grupi kryesor për sa u përket shpenzimeve.
Prirja e tanishme pritet t’u japë një goditje të rëndë bizneseve në gjithë ekosistemin turistik të Japonisë, që nga kompanitë ajrore e hotelet deri te dyqanet e suvenireve dhe vendet piktoreske.
