Gazetaria shqipfolëse nga Shqipëria, Kosova dhe Maqedonia e Veriut u vu sot në qendër të vëmendjes përmes një ceremonie vlerësimi, ku u ndanë çmime për ekselencë profesionale në disa zhanre, përfshirë ekonominë, sportin, raportimin cilësor, si edhe çmimet e karrierës dhe ato speciale. Aktiviteti u mbajt në Ambasadën Gjermane në Tiranë, në prani të përfaqësuesve të lartë institucionalë dhe figurave të njohura të medias, si edhe të kryetarit të Kuvendit, Niko Peleshi, deputetes së Partisë Demokratike, Jorida Tabaku, dhe ambasadorit gjerman, Karl Bergner.
Ambasadori i Gjermanisë në vendin tonë, Karl Bergner, tha gjatë fjalës së tij përshëndetëse, se “Gjermania i mbështet iniciativa të tilla jo vetëm në kuadër të integrimit në Bashkimin Evropian”.
“Gjermania mbështet edhe iniciativa të tjera përmes partnerëve të vet siç është GIZ në rajon. Përmes tyre, ne nxisim jo vetëm përmbajtjen, por edhe elementin komercial të këtyre strukturave mediatike. Në janar të vitit tjetër do të kemi të parën thirrje Open Call në kuadër të këtij konkursi. Pa punën e gazetarëve, një Shqipëri në perspektivë dhe përparuese do të ishte e pamundur”, tha Bergner.
Kryetari i UGSH-së, Aleksandër Çipa u shpreh se organizata që ai drejton është më masivja në komunitetin e gazetarëve shqiptarë në hapësirën shqiptarë.
“Me një kontribut që po shkon në dy dekada, UGSH ka qenë një zë i maturuar dhe reagues në kohën e duhur. UGSH vlerëson të cilësishmit, ndërsa në jo pak raste ka pasur dhe inkurajime ndërkombëtare dhe nga partnerë të huaj”, tha Çipa.
Kryetari i Kuvendit, Niko Peleshi tha se “Shqipëria ndodhet në një moment të rëndësishëm të rrugëtimit historik, pranë BE-së”.
“Kjo jo vetëm për institucionet, por edhe për shoqërinë shqiptare dhe gazetarinë. BE është një hapësirë e madhe, të cilën duhet ta shfrytëzojmë, ta njohim dhe t’ia sjellim publikut. Sfidat që sjell BE, standardet e reja që duhet të krijojmë në politikë, në shoqëri, sipërmarrje janë shumë të mëdha dhe kanë nevojë të njihen. Me shqetësim konstatoj se BE-ja, nga shoqëria e gjerë, nga qytetarët vazhdon të perceptohet si punë e politikanëve”, tha ai.
“Kjo mund të jetë një pjesë teknike e këtij procesi, pjesë e integrimit duhet të bëhet e gjithë shoqëria dhe këtu gazetaria ka një rol të jashtëzakonshëm. Një element ku duhet të bëhet më shumë është transparenca, pra duhet të jemi më të hapur, ndaj jush dhe ta bëjmë informacionin më të aksesueshëm. Në Kuvend po punojmë për ndërtimin e një qendre mediatike në mënyrë që gjithçka që ndodh në Kuvend, të jetë i aksesueshëm në kohë reale nga ju”, tha Peleshi.
Ndërsa, deputetja e PD, Jorida Tabaku u shpreh se sot është shumë e vështirë të bëhet gazetari cilësore.
“Në pozicionin që unë kam, si kryetare e Komisionit të Medias, kemi nisur punën për disa iniciativa ligjore të cilat shpresoj të përmirësojnë mjedisin mediatik, por edhe mbrojtjen e gazetarëve. Duke nisur nga ndryshimi i kodit sa i përket mbrojtjes nga kërcënimi, deri te dekriminalizimi i shpifjes”, tha Tabaku.
Çmimet e Gazetarëve për vitin 2025 vlerësuan kontributin dhe profesionalizmin e gazetarëve nga hapësira shqipfolëse, duke evidentuar punën cilësore në fusha të ndryshme të gazetarisë. Përmes konkursit “Vangjush Gambeta” u shpërblyen gazetarët e ekonomisë, ndërsa çmime të veçanta u akorduan për raportimin dhe reporterin më të mirë të vitit, gazetarinë sportive, si dhe për kontributin special. Një vëmendje e veçantë iu kushtua edhe figurave me ndikim afatgjatë në media, përmes çmimeve të karrierës, duke nderuar trashëgiminë profesionale dhe përkushtimin ndër vite ndaj gazetarisë.
Çmimet e gazetarëve për vitin 2025:
Fitues të konkursit “Vangjush Gambeta” për gazetarët e ekonomisë:
Eliza Gjediku
Ilda Hoxha
Uran Haxha
Anëmsha Shabani
Çmimi “Raportimi më i mirë i vitit”– Florian Goga
Çmimi “Reporteri më i mirë i vitit”– Eraldo Harlicaj
Çmimi special – Besim Dybeli
Çmimi “Gazetari sportiv i vitit”– Saimir Demi
Çmimi i “Karrierës I” – Nazim Rashidi
Çmimi i “Karrirës II”– Artur Zheji
/Argumentum.al
