Më 13 dhjetor 2025, në një ceremoni solemne, Ambasadori i Republikës së Kosovës në Shqipëri, z. Skënder Dyrmishi, u nderua me titullin “Nderi i Mirditës”. Ky çmim, i akorduar nga Akademia e Letrave, Shkencës dhe Artit “Mirdita”, iu dha sivjet ambasadorit si shenjë vlerësimi të veçantë për kontributin e tij institucional dhe njerëzor, si dhe për lidhjen e qëndrueshme, të sinqertë dhe të vazhdueshme që ai ka ndërtuar ndër vite me Mirditën dhe komunitetin mirditor.
Në fjalën e tij përshëndetëse, ambasadori Dyrmishi shprehu mirënjohje të thellë për këtë nderim, duke theksuar se e sheh çmimin jo si vlerësim personal, por si një përgjegjësi morale ndaj historisë dhe trashëgimisë së Mirditës. Ai vuri në pah peshën simbolike të këtij titulli, duke e cilësuar Mirditën si një sinonim të qëndresës, rezistencës dhe mbrojtjes së identitetit kombëtar ndër shekuj.
Ambasadori Dyrmishi kujtoi me respekt të veçantë rolin e Mirditës gjatë luftës në Kosovë, kur mirditorët hapën dyert për familjet e strehuara dhe dhanë kontribut të jashtëzakonshëm njerëzor e kombëtar. Ai theksoi se këto lidhje, të krijuara në ditë të vështira, janë shndërruar në miqësi të përhershme dhe në një amanet brezash për t’u ruajtur e pasuruar.
Në vijim, ambasadori përmendi me nderim figura të shquara të Mirditës që kanë lënë gjurmë të thella në historinë kombëtare dhe në jetën kulturore e shpirtërore të Kosovës, si Prend Doçi, Gjon Gazulli, Rrok Mirdita, Anton Çetta dhe shumë personalitete të tjera fetare, kulturore e shkencore. Veçanërisht, ai ndaloi te figura madhore e Anton Çettës, duke e cilësuar si një kolos të pajtimit, dijes dhe frymëzimit kombëtar.
Ambasadori Dyrmishi vlerësoi gjithashtu rolin e Akademisë së Letrave Mirdita dhe revistës “Mirdita” si ura të rëndësishme bashkëpunimi kulturor ndërmjet Mirditës dhe Kosovës, duke përgëzuar z. Pjetër Marku dhe ekipin e tij për angazhimin e vazhdueshëm në ndërtimin e këtyre lidhjeve përmes letërsisë, shkencës dhe veprimtarive të përbashkëta.
Fjala e plotë e Ambasadorit të Republikës së Kosovës, z. Skënder Dyrmishi,
mbajtur me rastin e ndarjes së titullit “Nderi i Mirditës”,
13 dhjetor 2025
Zonja dhe zotërinj, mirditorë e mirditore,
Të nderuar pjesëmarrës,
Në emër të Ambasadës së Kosovës ju përshëndes të gjithëve.
Jam thellësisht mirënjohës për çmimin “Nderi i Mirditës”.
Nuk e di nëse, dhe me çka, e kam merituar, por ju siguroj se e di rëndësinë e jashtëzakonshme dhe kuptimin e vërtetë, simbolikën e këtij çmimi dhe nderimi që po më bëni.
Është vetë Mirdita, historia e saj, janë mirditorët, kontributi i tyre në fondin e madh të trashëgimisë kombëtare, që na obligon të gjithëve për respekt.
Mirdita është sinonim qëndrese e rezistence nëpër shekuj, para çdo lloj kërcënimi e çdo lloj armiku, duke mbrojtur identitetin kombëtar dhe vlerat tradicionale.
Përfitoj nga ky rast, emocional për mua, që të përsëris kënaqësinë dhe mirënjohjen për lidhjet e forta të Mirditës me Kosovën. Janë lidhje të veçanta, janë lidhje të sinqerta dhe janë lidhje të ndërsjella.
Unë, tani edhe si laureat i një çmimi prestigjioz, “Nderi i Mirditës”, por edhe nga detyra e përfaqësuesit shtetëror të Kosovës, shpreh mirënjohjen e thellë për respektin dhe dashurinë që keni dhe që keni treguar gjithmonë për Kosovën. Bashkë kuptohemi mirë e lehtë. Bashkë i shijojmë më shumë e më mirë festat, dasmat e gëzimet. Por edhe në ditë të liga kemi qenë gjithmonë dhe do të jemi gjithmonë pranë njëri-tjetrit. Gjatë luftës në Kosovë, Mirdita e mirditorët e treguan veten, me angazhimin dhe kontributin e tyre; nuk kursyen asgjë. Të rënët në luftë na lanë shëmbëlltyrën se si veprohet në këto raste, kur kërcënohet një pjesë e kombit. Por edhe familjet e shumta që gjetën strehë ato ditë në Mirditë, këtu i solli halli, por miqësia që krijuan, ka forcuar lidhjet e Kosovës me Mirditën. Të gjithë ne të tjerëve, na mbetet si borxh e amanet brezash të ruajmë e të pasurojmë këto lidhje me vepra e vlera të reja.
Miq të nderuar,
Mirënjohja që më keni akorduar është rast për mua që të shpreh, përveç falënderimeve, edhe respektin për Mirditën dhe mirditorët.
Respekti për Mirditën ka histori e rrënjë të thella. Nga një listë e gjatë me emra të njohur, po përmend vetëm disa: Abati i mirënjohur Prend Doçi, imzot Gjon Gazulli, imzot Rrok Mirdita, martirët Frano Gjini e Marie Tuci, të gjithë emra të nderuar, personalitete e karaktere të forta, me dije, vizion, guxim e integritet që, duke mbrojtur parime të larta, nderuan kombin para botës; na kanë nderuar të gjithëve.
Ata kanë bërë që ta duam e ta respektojmë edhe më shumë Mirditën.
Por ka edhe të tjerë, shumë të tjerë, të cilët fati i jetës dhe, sigurisht, përcaktimi i tyre, i solli në Kosovë, ku lanë përshtypje e sentimente të forta: dom Anton Kçira, Kristë Maloki, Ndrecë Ndue Gjoka, Zef Mirdita, Mark e Gjergj Kaqinari, Lorenc Antoni, Hasan Hasani, Leze Spaqi-Qena e shumë e shumë të tjerë, që kanë lënë gjurmë me veprën e tyre.
I këtyre përmasave ishte edhe i madhi Anton Çetta, një kolos i vërtetë. Po e përmend veçmas për faktin se pata fatin ta takoj e ta njoh personalisht.
Përmes Anton Çettës, dhe nga vepra e tij e përmasave epike, sidomos pajtimi i gjaqeve dhe mbledhja e folklorit, kemi vlerësuar faktin se nga Mirdita është frymëzuar për ato vepra të mëdha që bëri në Kosovë.
Nuk mund të lë pa përmendur, si një vazhdimësi misionare, edhe rolin e veçantë të Akademisë së Letrave Mirdita dhe revistën “Mirdita”. Çdo numër i revistës ka hapësirë të konsiderueshme për poetë e krijues letrarë nga Kosova. Konkurset e revistës “Mirdita” nuk njohin kufij.
Është për t’u lavdëruar bashkëpunimi aktiv me krijuesit letrarë e shkencorë të Kosovës, takimet e shpeshta nëpër orë letrare, simpoziume e manifestime të ndryshme, botime të përbashkëta etj.
Kam fjalët më të mira për z. Pjetër Marku dhe ekipin e miqve dhe të krijuesve të mbledhur rreth Akademisë. Janë model se si duhet të bashkëpunojmë, ne dhe ju. Përmes z. Pjetër dhe miqve të tij njoha e mësova më shumë për Mirditën, mirditorët dhe mikpritjen mirditore. Vizita ime nëpër fshatra, në vende e monumente historike, takimi me personalitete të shquara të Mirditës. Kur takohemi bashkë me këta miq, gjysma e rrëfimeve dhe e personazheve duhet të jetë patjetër nga Kosova.
Ja, pra, kam përmendurkëtu vetëm disa nga arsyet pse jam i nderuar dhe i privilegjuar me mirënjohjen “Nderi i Mirditës”, siç jam i privilegjuar me listën e gjatë të miqve të mi mirditorë, që më kanë bërë shpirtërisht më të pasur.
Mirënjohjen ia dedikoj, pra e ndaj me të gjithë ata që, në ndonjë mënyrë, kanë ndikuar tek unë për njohje dhe respekt ndaj Mirditës, që nga familja ime, me rrëfimet që kam dëgjuar në rini, pastaj profesorët, deri te mirditorët që kam takuar e që e kanë vërtetuar tek unë bindjen e hershme për Mirditën.
Po e mbyll këtë fjalë timen me urtinë e moçme shqiptare:
I ndershmi të nderon.
Qofshi gjithmonë të nderuar! Faleminderit!
© 2025 Argumentum
