Kryeministri i Shqipërisë, Edi Rama, iu drejtua sot Knessetit, Parlamentit të Izraelit, në një seancë të posaçme sipas një protokolli të rezervuar për një numër shumë të kufizuar udhëheqësish botërorë. Para tij, në këtë sallë kanë folur vetëm figura të rralla të politikës globale, përfshirë së fundmi Presidentin e Shteteve të Bashkuara, Donald J. Trump.
Seanca u hap me përshëndetjet e Kryeministrit të Izraelit Benjamin Netanyahu, Kryetarit të Knessetit Amir Ohana dhe Liderit të Opozitës Yair Lapid, të cilët vlerësuan marrëdhëniet e veçanta mes dy vendeve dhe rolin e Shqipërisë si një aleate e besueshme e Izraelit.
Në fjalimin e tij, Rama e cilësoi këtë moment si një nder të jashtëzakonshëm për Shqipërinë dhe popullin shqiptar, duke theksuar se respekti i Izraelit është i merituar për një vend që, gjatë Holokaustit, mbrojti hebrenjtë pa dallim feje apo rreziku. Ai kujtoi se Shqipëria është i vetmi vend në Europë që doli nga Lufta e Dytë Botërore me më shumë hebrenj sesa kishte para saj, pa dorëzuar asnjë prej tyre te nazistët.
Kryeministri theksoi traditën unike shqiptare të bashkëjetesës fetare, duke e cilësuar atë jo si “tolerancë”, por si “vëllazëri fetare”, sipas përkufizimit të Papa Françeskut gjatë vizitës së tij në Tiranë. Rama përmendi gjithashtu 73 shqiptarët e shpallur “Të Drejtë midis Kombeve” në Yad Vashem dhe njoftoi hapjen e afërt të muzeut të parë shqiptar kushtuar shpëtimit të hebrenjve, në qytetin e Vlorës.
Një pjesë e rëndësishme e fjalimit iu kushtua situatës në Gaza. Rama u shpreh se vuajtja e civilëve izraelitë dhe palestinezë duhet të shërbejë si një thirrje e re për paqe, duke theksuar se Hamasi është përgjegjësi kryesor për shndërrimin e Gazës në një “burg në qiell të hapur”. Ai nënvizoi se pa çmontimin e plotë të Hamasit, as paqja dhe as liria për palestinezët nuk mund të jenë të qëndrueshme.
Kryeministri shqiptar rikujtoi angazhimin e Shqipërisë në mbrojtje të vlerave humane, duke përmendur strehimin e mijëra opozitarëve iranianë dhe afganë, si dhe qëndrimin e fortë të Tiranës kundër regjimit iranian pas sulmeve kibernetike ndaj infrastrukturës shqiptare.
Duke folur për të ardhmen e Lindjes së Mesme, Rama vlerësoi Marrëveshjet Abrahamike dhe proceset e modernizimit në vendet arabe, duke i krahasuar me një “moment Rilindjeje” për rajonin. Ai theksoi se paqja mes Izraelit dhe botës arabe është e vetmja rrugë drejt një të ardhmeje të qëndrueshme dhe se Shqipëria është e gatshme të kontribuojë në përpjekjet ndërkombëtare për stabilizimin e Gazës.
Në mbyllje, Rama citoi fjalët e ish-Kryeministrit izraelit Yitzhak Rabin, duke u bërë thirrje izraelitëve dhe palestinezëve t’i japin paqes një shans. Ai uroi siguri dhe lulëzim për Izraelin, liri dhe dinjitet për palestinezët, dhe theksoi lidhjen e veçantë mes dy kombeve të vogla, por “të mëdha në shpirt”.
“Le të mbetet njerëzimi njerëzor,” përfundoi Rama mes duartrokitjeve të sallës.
