Ziraat Bank, një nga institucionet financiare më të vjetra dhe më të rëndësishme të Turqisë, ka zgjeruar praninë e saj në Ballkan me hapjen e degës së parë në Tiranë. E themeluar në vitin 1863 dhe me një rrjet ndërkombëtar që shtrihet në 21 vende, banka turke e sheh tregun shqiptar si pjesë të rëndësishme të zgjerimit të saj rajonal dhe të forcimit të bashkëpunimit ekonomik mes Turqisë dhe vendeve të Ballkanit.
Në ceremoninë e organizuar në ambientet e zyrave të bankës Ziraat në Tiranë ishin të pranishëm Kryeministri i Shqipërisë, Edi Rama, Ambasadori i Turqisë në Tiranë, Baris Ceyhun Erciyes, ministrja e Ekonomisë dhe Inovacionit e Shqipërisë, Delina Ibrahimaj, Zëvendësministri i Thesarit dhe Financave i Turqisë Abdullah Erdem Cantimur, Drejtori i Përgjithshëm i Bankës Ziraat, Alpaslan Çakar dhe përfaqësues të tjerë të institucioneve turke dhe shqiptare.
Duke përshëndetur hyrjen e bankës turke në tregun shqiptar, Rama e cilësoi Ziraat Bank si “një nga flamurtarët më krenarë të ekonomisë turke”, duke theksuar se prania e saj do të kontribuojë në rritjen e konkurrencës në sektorin financiar shqiptar.
“Ju nuk sillni vetëm përvojën tuaj në Turqi, por edhe një eksperiencë të rëndësishme ndërkombëtare. Presim që kjo prani të sjellë vlerë të shtuar për tregjet tona”, deklaroi Rama.Kryeministri shqiptar nënvizoi gjithashtu se marrëdhëniet mes Shqipërisë dhe Turqisë do të vazhdojnë të zhvillohen në të gjitha fushat.
Ambasadori turk Erciyes theksoi se “I uroj suksese Bankës Ziraat. Besoj se prania e saj këtu do të sjellë shumë përfitime dhe do të mundësojë zhvillimin e marrëdhënieve tona ekonomike dhe dypalëshe”.
“Jam plotësisht i bindur se, nën udhëheqjen e Presidentit Recep Tayyip Erdogan dhe Kryeministrit Rama, marrëdhëniet tona do të vazhdojnë të zhvillohen në çdo fushë”, shtoi ambasadori.
Nga ana e tij, Drejtori i Përgjithshëm i Ziraat Bank, Alpaslan Çakar, theksoi se institucioni që ai drejton, me një histori 163-vjeçare, është një prej bankave më të rëndësishme dhe më të respektuara të Turqisë.
Sipas tij, hapja e degës në Shqipëri nuk është vetëm zgjerim i aktivitetit bankar, por edhe një “investim konkret në të ardhmen e miqësisë së rrënjosur thellë, besimit të ndërsjellë dhe bashkëpunimit ekonomik në rritje mes Turqisë dhe Shqipërisë”.
Hapja e degës së Ziraat Bank në Tiranë i shtohet një serie zhvillimesh që reflektojnë thellimin e marrëdhënieve ekonomike dhe institucionale mes Shqipërisë dhe Turqisë. Përtej dimensionit financiar, prania e bankës turke përfaqëson një tjetër urë bashkëpunimi mes dy vendeve, duke krijuar mundësi të reja për bizneset, investimet dhe shkëmbimet ekonomike.
© 2026 Argumentum
