Kryeministri Edi Rama tha sot se protesta e qytetarëve, e cila nisi kundër investimit turistik në Zvërnec, ka shërbyer si një sfidë reale për qeverinë, duke e cilësuar atë si një mundësi për të përmirësuar qeverisjen dhe raportin me qytetarët.
Përmes një videomesazhi në rrjetet sociale pas mbledhjes me kabinetin qeveritar në Pogradec, Rama shprehu bindjen se nga kjo situatë më të fortë do të dalin qytetarët shqiptarë dhe qeveria e tyre.
Sipas Kryeministrit, qeverisja do të përmirësohet për shkak të dijes dhe eksperiencës së fituar, por edhe si rezultat i sfidës së ardhur nga protesta qytetare.
Rama u ndal gjithashtu edhe tek protesta që vijon para Kryeministrisë, duke thënë se ajo që e kishte sfiduar realisht qeverinë ishte protesta në momentin kur, sipas tij, qytetarët dolën për të kërkuar më shumë.
“Dëgjoni, unë e kuptoj shumë mirë që gjithçka ka ndodhur në këtë periudhë ka gërryer një shtrat të një lumi, nëse mund ta bëj këtë krahasim, të qeverisjes edhe të raportit të qytetarit me shtetin, me qeverisjen. Por unë jam i bindur që, siç e kam thënë që çka në krye të herës, në të gjithë këtë vorbull, ata që do të dalin më të fortë do të jenë qytetarët shqiptarë dhe qeveria e tyre.
Sepse qeverisja do të përmirësohet dhe nuk ka se si të ndodhë ndryshe. Dhe jo thjesht sepse qeverisja, bazuar edhe në dijen e fituar, edhe në eksperiencën e fituar, edhe në burimet njerëzore në dispozicion, vetvetiu duhet të përmirësohet, sepse përndryshe nuk ka asnjë arsye që të vazhdojë. Por sepse në këtë rast ka qenë vërtet një dhuratë ajo që ka ndodhur, për të fituar atë që na ka munguar për një kohë të gjatë, sepse s’kemi pasur asnjëherë opozitë në gjendje që të na sfidojë realisht.
Dhe ajo protestë që ndodhi na ka sfiduar realisht, jo kjo që vazhdon, sepse kjo që vazhdon është një tjetër gjë për të cilën as nuk kam interes që të flas. Është një konglomerat i cili sigurisht që ka të gjithë të drejtën e vet të vazhdojë të ekzistojë për sa kohë ka fuqinë dhe ka edhe karburantin e paguar për të ekzistuar, po s’është kjo. Kjo i ngjan shumë me ato jashtënxjerrjet e zakonshme të opozitës së vetasgjësuar. Flas për atë protestë për sa kohë ajo ishte qytetare dhe për sa kohë aty u shfaqën njerëz të cilët i çoi aty nevoja për të bashkuar zërin dhe për të thënë: “Sot ne meritojmë më shumë”. Kjo është e mbarë”, tha Rama.
Kryeministri theksoi gjithashtu se qeveria nuk duhet të kënaqet me arritjet e deritanishme dhe as me krahasimet me të kaluarën.
“Dhe nuk na mjaftojnë ato që janë bërë, nuk na mjafton absolutisht krahasimi me nga ku u nisëm e të tjerë, e të tjerë. Kështu që unë jam i bindur për këtë, jam shumë optimist për këtë, jam shumë i energjizuar për këtë. Dhe dua vetëm të mos harroni një gjë të gjithë: Shqipëria nuk ka qenë kurrë më mirë, nuk ka qenë kurrë më e vlerësuar ndërkombëtarisht, nuk ka qenë kurrë më e mbështetur në mundësi reale për të bërë më shumë.
Dhe kjo ka një arsye themelore: sepse Shqipëria nuk ka qenë më një vend në shitje ose një vend i shitur, se nuk ka vend në shitje dhe vend të shitur që respektohet ndërkombëtarisht, nuk ka vend në shitje dhe vend të shitur që shton mundësitë e veta për njerëzit e vet, nuk ka vend në shitje dhe vend të shitur që rritet çdo ditë”, tha Rama.
Rama iu referua edhe komenteve në rrjetet sociale edhe për hundën dhe asimetrinë e fytyrës së tij, duke kritikuar mënyrën se si, sipas tij, algoritmet ndërmjetësojnë përplasjet politike në hapësirat digjitale.
Kryeministri shpjegoi se shenja lidhet, sipas tij, me dëshirën për të jetuar në një Shqipëri që “të rrinte drejt” dhe ku qytetarët të mos ndiheshin të detyruar të ulnin kokën për vendin e tyre.
“Tjetra është se shoh që ka herë pas here kur në këto video njerëz që merren me hundën time, merren me asimetrinë e saj. Merren me këtë asimetri dhe falë edhe kontributit të algoritmit që ka ndërmjetësuar qenërinë politike të Shqipërisë jashtë këtyre pasqyrave digjitale me ata që jetojnë në këto pasqyra, vjen ajo ironia e mallit, e drogës, e shtrembërimit.
Ky shtrembërim është shenja që trupi im do ta mbajë gjithë jetën nga një tentativë për të më fshirë nga faqja e këtij dheu, ku unë kam lindur, ku jam rritur dhe ku jam sot këtu. Sepse edhe këtë gjurmë nuk e kam nga ndonjë arsye tjetër, por sepse edhe kur s’kisha asgjë në dorë, doja një vend që të rrinte drejt. Doja të jetoja në një vend që të mos i bënte bijtë e vet të ulin kokën kur i pyesnin “Çfarë je ti?”. Dhe është pikërisht për këtë vend që unë mbaj edhe këtë gjurmë. Nuk i vë faj të gjithëve ju që i bëni thirrje hundës sime duke i qarë hallin për “mallin e keq që ka marrë”. Sepse jeni përgjithësisht shumë më të rinj se ajo histori dhe unë nuk jam këtu për të treguar historinë time. Për mua s’ka asnjë rëndësi historia. Nëse ka një histori timen që unë një ditë mund ta tregoj, është historia e gjërave që nuk arrita të bëj dot. Asgjë tjetër”, tha Rama.
© 2026 Argumentum
