Ministri për Evropën dhe Punët e Jashtme, Ferit Hoxha, ka përcaktuar prioritetet e diplomacisë shqiptare deri në fund të vitit, duke vënë në fokus procesin e integrimit në Bashkimin Evropian, forcimin e bashkëpunimit rajonal dhe modernizimin e Shërbimit të Jashtëm.
Në një postim në platformën X, pas Seminarit të Qeverisë në Pogradec, Hoxha theksoi se vijimësia e procesit të anëtarësimit në BE mbetet objektivi parësor i politikës së jashtme shqiptare.
“Do të kërkojë ritëm të shtuar, fokus të qartë dhe angazhim të plotë diplomatik”, u shpreh ministri.
Një tjetër prioritet, sipas Hoxhës, është forcimi i bashkëpunimit rajonal, me synimin për një Ballkan Perëndimor më të stabilizuar, më të ndërlidhur dhe më pranë Evropës.
Në fokus do të jetë edhe modernizimi i shërbimeve konsullore, të cilat, sipas ministrit, synohet të bëhen më të shpejta, më të aksesueshme dhe më të orientuara ndaj qytetarit.
Hoxha nënvizoi gjithashtu rëndësinë e reformimit të mëtejshëm të Shërbimit të Jashtëm, për ndërtimin e një diplomacie moderne, profesionale dhe meritokratike.
Sipas tij, Shqipëria ka nevojë për një korpus diplomatik të aftë dhe të angazhuar për të përfaqësuar vendin, për të mbrojtur interesat kombëtare dhe për të krijuar më shumë mundësi për qytetarët dhe ekonominë shqiptare.
Në këtë kuadër, ministri renditi disa nga objektivat kryesore të diplomacisë shqiptare: rritjen e ndikimit në imazhin dhe projektimin kulturor të vendit, forcimin e lidhjeve me ekonominë dhe tregtinë, zgjerimin e partneriteteve dhe krijimin e rezultateve konkrete për Shqipërinë dhe qytetarët shqiptarë.
“Një Shqipëri europiane kërkon edhe një diplomaci europiane”, përfundoi Hoxha.
/Argumentum.al
