Zv.presidenti kinez Han Zheng tha të premten se, si një promovuese e vendosur dhe protagoniste pragmatike për zhvillimin global, Kina është e gatshme të punojë me të gjitha palët për të mbështetur multilateralizmin e vërtetë, për të çuar përpara së bashku Nismën e Zhvillimit Global (GDI) dhe për t’u ofruar përfitime zhvillimi popujve të vendeve të ndryshme.
Han i bëri këto komente gjatë fjalimit në Dialogun e Nivelit të Lartë për Pesëvjetorin e Nismës së Zhvillimit Global, të organizuar nga Kina në selinë e Kombeve të Bashkuara. Gjatë këtij eventi, Han lexoi letrën e urimit të presidentit kinez Xi Jinping dhe mbajti një fjalim.
Duke vënë në dukje se Xi e propozoi GDI-në në sesionin e 76-të të Asamblesë së Përgjithshme të Kombeve të Bashkuara në shtator 2021, Han tha se gjatë pesë viteve të fundit, me angazhimin personal të presidentit kinez dhe përpjekjet e përbashkëta të të gjitha palëve, GDI-ja ka evoluar nga një propozim dhe koncept kinez në një përpjekje të përbashkët ndërkombëtare.
Ai tha se GDI-ja ka forcuar konsensusin ndërkombëtar mbi dhënien përparësi zhvillimit, ka çuar përpara bashkëpunimin në fushën e zhvillimit me leverdi të ndërsjellë, u është përgjigjur nevojave të zhvillimit të vendeve në Jugun Global dhe i ka shndërruar planet e zhvillimit në bashkëpunim konkret, i cili ka kontribuar me zgjidhjet dhe forcën e Kinës në realizimin e Agjendës 2030 të Kombeve të Bashkuara për Zhvillim të Qëndrueshëm.
Zv.presidenti kinez theksoi që zhvillimi global aktualisht po përballet me sfida serioze, me zbatimin e Agjendës për Zhvillim të Qëndrueshëm 2030 të OKB-së që është dukshëm prapa afatit.
Për këtë, Han paraqiti katër propozime:
Së pari, forcimi i solidaritetit dhe bashkëpunimit dhe bërja e çdo përpjekjeje për të zbatuar Objektivat e Zhvillimit të Qëndrueshëm. Zbatimi i Agjendës për Zhvillim të Qëndrueshëm 2030 të OKB-së duhet të bëhet me përparësi, me rolin “përshpejtues” të GDI-së të shfrytëzuar plotësisht për të mbështetur OKB-në në forcimin e shtyllës së saj të zhvillimit.
Së dyti, ruajtja e një qasjeje të orientuar drejt veprimit dhe ndjekja aktive e zhvillimit që u sjell dobi njerëzve. Duhet të zbatohen më shumë projekte bashkëpunimi praktik “të vogla dhe të bukura” dhe “zemërngrohëse” për të ndihmuar vendet përkatëse të përmirësojnë infrastrukturën dhe të rrisin qëndrueshmërinë e zhvillimit.
Së treti, zgjerimi i prioriteteve të bashkëpunimit dhe përshpejtimi i zhvillimit që mbështet fuqizimin. Thellësia e bashkëpunimit të GDI-së duhet të forcohet në fusha të tilla si inteligjenca artificiale, ekonomia digjitale, energjia e re dhe parandalimi e zbutja e pasojave të fatkeqësive, në mënyrë që të kultivohen dhe forcohen nxitësit e rinj të zhvillimit të qëndrueshëm.
Së katërti, forcimi i partneriteteve dhe promovimi efektiv i zhvillimit të integruar. Grupi i Miqve të GDI-së dhe Task Forcë e OKB-së për Shfrytëzimin e Partneriteteve drejt Zbatimit të Agjendës 2030 duhet të zgjerohen dhe forcohen, dhe mekanizmat përkatës duhet të shfrytëzohen për të kryer gjerësisht bashkëpunimin dypalësh, shumëpalësh dhe trepalësh, duke krijuar përplotësimin e epërsive dhe efekte të ndërlidhura.
Han theksoi se arritja e zhvillimit të qëndrueshëm është aspirata e përbashkët e njerëzve nga të gjitha vendet dhe gjithashtu një mision i rëndësishëm i OKB-së.
Kina do të vazhdojë të luajë plotësisht rolin e saj si një vend i madh i përgjegjshëm. të punojë së bashku me të gjitha vendet dhe ta marrë përvjetorin e pestë të GDI-së si një pikënisje të re për të forcuar bashkëpunimin ndërkombëtar të zhvillimit dhe për të promovuar një zhvillim global më të fortë, më të gjelbër dhe më të shëndetshëm, duke dhënë kontribute të reja dhe më të mëdha në ndërtimin e një komuniteti me të ardhme të përbashkët për njerëzimin, vuri në dukje Han.
Zv.sekretarja e Përgjithshme e OKB-së, Amina Mohammed, kryeministri pakistanez Shehbaz Sharif, zv.presidenti i Maldiveve, Hussain Mohamed Latheef, dhe zv.kryeministri e ministri i Punëve të Jashtme i Laosit, Thongsavanh Phomvihane, mbajtën gjithashtu fjalime në këtë aktivitet të nivelit të lartë.
Zyrtarë të nivelit ministror nga më shumë se 30 vende morën pjesë në takim. Më shumë se 300 përfaqësues nga mbi 60 vende dhe mbi 20 organizata ndërkombëtare ishin të pranishëm.
Ata vlerësuan lart rolin e rëndësishëm të luajtur nga GDI-ja gjatë pesë viteve të fundit në mbështetjen e zhvillimit të qëndrueshëm në mbarë botën dhe në avancimin e zbatimit të Agjendës 2030.
GDI-ja ka dhënë një shtysë të fortë për zhvillimin global dhe ka sjellë rezultate të prekshme në fusha duke përfshirë uljen e varfërisë, sigurimin ushqimor, zhvillimin e gjelbër dhe industrializimin, thanë ata, duke shtuar se nisma u ka sjellë dobi vendeve në zhvillim dhe ka dhënë kontribute të rëndësishme për ndërtimin e konsensusit mbi zhvillimin dhe thellimin e bashkëpunimit ndërkombëtar.
Ata shprehën gatishmërinë e tyre për të vazhduar mbështetjen e fortë për GDI-në, për të forcuar solidaritetin dhe bashkëpunimin, dhe për të bashkuar forcat për të krijuar një të ardhme më përfshirëse, të qëndrueshme dhe elastike.-cgtn
