Në një postim të publikuar në X, me rastin e Ditës Botërore kundër Dënimit me Vdekje, Papa kujton se zbatimi i këtij dënimi nuk e mbron të mirën e përbashkët. Ekzistojnë zgjidhje alternative, që mbrojnë qytetarët, «por nuk ua heqin plotësisht fajtorëve mundësinë për t’u shëlbuar». Edhe në raste të tjera, ipeshkvi i Romës e ka ngritur zërin e tij dhe atë të Kishës në mbrojtje të jetës njerëzore
Vatican News
«Përdorni hashtagun #NoDeathPenalty», shkruan Papa Leoni XIV në postimin e publikuar në X, në llogarinë @Pontifex. Papa ndërhyn edhe një herë me fjalë të qarta dhe të drejtpërdrejta kundër dënimit me vdekje, një praktikë që është rikthyer në qendër të vëmendjes pas njoftimit të djeshëm të Pentagonit se do të transmetojë drejtpërdrejt dënimin me vdekje me pushkatim të Nidal Hassan-it, ish-majorit të ushtrisë, të dënuar për masakrën e vitit 2009 në Fort Hood, ku humbën jetën 13 vetë.
«Dënimi me vdekje është i papranueshëm, sepse cënon paprekshmërinë dhe dinjitetin e njeriut. E mira e përbashkët mund të mbrohet dhe kërkesat e drejtësisë mund të garantohen pa iu drejtuar dënimit kapital: janë zhvilluar sisteme efektive burgimi, të cilat mbrojnë qytetarët, por, njëkohësisht, nuk ua heqin plotësisht fajtorëve mundësinë për t’u shëlbuar. #NoDeathPenalty».
Të mos e humbasim dinjitetin
Papa Leoni XIV pati folur për dënimin me vdekje në një videomesazh të datës 24 prill 2026, drejtuar Universitetit DePaul në Çikago, në Shtetet e Bashkuara të Amerikës, me rastin e një veprimtarie përkujtimore për 15-vjetorin e heqjes së dënimit me vdekje në shtetin e Ilinoisit. Duke kujtuar se Kisha mbron jetën njerëzore që nga embrioni deri në vdekjen natyrore, Papa theksoi se «dinjiteti i njeriut nuk humbet as pas kryerjes së krimeve shumë të rënda».
Këto fjalë lidhen drejtpërdrejt me paragrafin 2267 të Katekizmit të Kishës Katolike, të ndryshuar nga Papa Françesku në vitin 2018. Aty nënvizohet «kuptimi i ri i sanksioneve penale nga ana e shtetit», në funksion të mbrojtjes së të mirës së përbashkët, dhe riafirmohet angazhimi për heqjen e dënimit me vdekje në mbarë botën.
/vaticannews
