Pas ditësh negociatash politike dhe vetëm në orët e fundit të afatit kushtetues, Kosova ka zhbllokuar krizën institucionale. Kuvendi ka zgjedhur Justina Shiroka-Pulën presidente të Republikës, ndërsa në të njëjtën seancë ka miratuar edhe ndryshimet në Ligjin për Dhomat e Specializuara.
Zgjidhja erdhi pas një serie propozimesh dhe negociatash mes shumicës dhe opozitës për gjetjen e një kandidature që do të siguronte votat e nevojshme për kreun e shtetit.
Kryeministri Albin Kurti e ndryshoi propozimin e tij në orët e fundit, duke propozuar akademiken Justina Shiroka-Pula. Në këmbim të pjesëmarrjes së deputetëve të PDK-së në votimin për presidentin, Kurti propozoi që ndryshimet në Ligjin për Dhomat e Specializuara të votoheshin paraprakisht në të njëjtën seancë.
PDK e pranoi propozimin. Kreu i saj, Bedri Hamza, deklaroi se Shiroka-Pula ishte një emër i pranueshëm për partinë dhe se deputetët e saj do të merrnin pjesë në procesin e votimit.
Kuvendi votoi fillimisht ndryshimet në ligjin për Dhomat e Specializuara dhe Zyrën e Prokurorit të Specializuar, një çështje që ishte rikthyer në qendër të debatit politik pas vendimit të Gjykatës Speciale për ish-krerët e UÇK-së dhe protestave që pasuan.
Më pas, deputetët votuan për presidenten e re.
Deputetët e Kuvendit të Kosovës kanë votuar Justina Shiroka-Pulën për presidente të Republikës së Kosovës. Në votim kanë marrë pjesë 84 deputetë. Justina Shiroka-Pula ka marrë 81 vota, Eliza Hoxha një votë, ndërsa dy deputetë kanë abstenuar. Me 81 vota, Shiroka-Pula është zgjedhur presidente e re e Kosovës.
Akademikja Justina Shiroka-Pula është propozuar nga kryeministri Albin Kurti për presidente të Republikës së Kosovës.
Shiroka-Pula aktualisht është kryetare e Akademisë së Shkencave dhe të Arteve të Kosovës (ASHAK). Në të kaluarën, ajo ka shërbyer edhe si ministre e Energjisë dhe Minierave.
Sipas biografisë së publikuar nga ASHAK-u, Justina Shiroka-Pula ka lindur në vitin 1953 në Prishtinë, ku ka përfunduar shkollimin fillor dhe të mesëm. Në vitin 1976 ka diplomuar në Fakultetin Ekonomik të Universitetit të Prishtinës.
Studimet pasuniversitare në fushën e teorisë dhe politikës së zhvillimit ekonomik i ka vijuar në Fakultetin e Shkencave Ekonomike në Zagreb, ku ka diplomuar në vitin 1984.
Karrierën akademike e ka nisur në vitin 1978 në Fakultetin Ekonomik të Universitetit të Prishtinës, fillimisht si asistente e lëndës “Kërkimet Operacionale”. Gjatë karrierës së saj akademike ka kaluar nëpër nivelet e avancimit akademik dhe në vitin 2004 është zgjedhur profesoreshë ordinare.
Gjatë angazhimit të saj në Universitetin e Prishtinës, Shiroka-Pula ka shërbyer si shefe e Departamentit të Menaxhmentit dhe Informatikës, anëtare e Senatit të Universitetit të Prishtinës dhe anëtare e Bordit Drejtues të universitetit.
Ajo ka ndjekur gjithashtu studime, programe postdoktorale dhe trajnime akademike jashtë vendit, përfshirë Universitetin e Linzit në Austri dhe Universitetin e Arizonës në Shtetet e Bashkuara të Amerikës.
Seanca e jashtëzakonshme e Kuvendit ishte kthyer në pikën vendimtare të përpjekjes për të shmangur një zgjatje të mëtejshme të krizës institucionale. Zgjedhja e presidentes dhe votimi i ligjit për Dhomat e Specializuara, brenda së njëjtës seancë, shënojnë rikthimin e procesit institucional në një rrugë funksionale pas një periudhe të gjatë bllokimi.
© 2026 Argumentum
