Brenda Partisë Socialdemokrate të Gjermanisë (SPD) po shtohen thirrjet për përjashtimin e ish-kancelarit Gerhard Schröder nga partia, për shkak të lidhjeve të tij të ngushta me presidentin rus Vladimir Putin.
Dega e SPD-së në rajonin e Palatinatit të Epërm, në Bavari, miratoi njëzëri një mocion që kërkon përjashtimin e Schröderit, bëri të ditur të shtunën kryetarja e degës, Carolin Wagner.
Nisma vjen pas takimit të fundit të Schröderit me Putinin në Moskë, ku ish-kancelari mori pjesë në festimin e ditëlindjes së 74-t të liderit rus, të mërkurën.
Kremlini publikoi fotografi ku të dy shfaqen duke buzëqeshur dhe duke shtrënguar duart. Në të njëjtën ditë, sulmet ruse në Ukrainë vranë më shumë se dy duzina njerëz.
Sipas gazetës Tagesspiegel të Berlinit, edhe drejtuesit e SPD-së në landet e Bavarisë dhe Baden-Württembergut kanë kërkuar përjashtimin e Schröderit.
“Një ish-kancelar që merr pjesë në festat e ditëlindjes së kriminelëve të luftës e bën veten të papranueshëm jo vetëm për SPD-në”, deklaroi Robin Mesarosch, bashkëkryetar i SPD-së në Baden-Württemberg.
“Schröder është një turp për të gjithë vendin”, tha ai për Tagesspiegel.
Schröder, 82 vjeç, ruan një miqësi të ngushtë me Putinin që nga koha kur drejtonte qeverinë gjermane, nga viti 1998 deri në vitin 2005. Politikani i qendrës së majtë është përballur prej vitesh me kritika për afërsinë me liderin rus dhe për përfshirjen e tij në bizneset e kompanive ruse të energjisë.
Që nga nisja e pushtimit në shkallë të plotë të Ukrainës nga Rusia, Schröder është takuar disa herë me Putinin.
Presidenti rus është objekt i një urdhër-arresti të lëshuar nga Gjykata Penale Ndërkombëtare në Hagë që prej vitit 2023, lidhur me dyshimet për krime lufte.
Një përpjekje e mëparshme për ta përjashtuar Schröderin nga SPD-ja dështoi në vitin 2023.
Bashkëkryetari i SPD-së në Bavari, Sebastian Roloff, i tha Tagesspiegel se kishte dyshime nëse një procedurë e re për përjashtimin e tij do të kishte sukses, por shtoi: “Nëse ka një mundësi, duhet të provohet”.
Schröder akuzohet për tradhti ndaj vlerave të SPD-së
Mocioni i degës së Palatinatit të Epërm, të cilin e ka siguruar agjencia dpa, i kërkon drejtimit kombëtar të SPD-së “të nisë menjëherë procedura të reja disiplinore kundër Gerhard Schröderit, mbi bazën e ngjarjeve të bëra së fundmi publike, me synimin për ta përjashtuar atë nga SPD-ja”.
Në mënyrë të veçantë, mocioni përmend pozicionin e Schröderit në bordin mbikëqyrës të zinxhirit rus të shitjes me pakicë Hyperglobus, si dhe vizitën e tij te Putini në ditëlindjen e presidentit rus.
Afërsia publike e Schröderit me Putinin “bie në kundërshtim të thellë me vlerat themelore të socialdemokracisë” dhe dëmton besueshmërinë e partisë, thuhet në mocion.
Wagner, e cila është gjithashtu deputete e SPD-së në Bundestagun gjerman, vuri në dukje luftën agresore të Rusisë, me “mijëra viktima, fëmijë të rrëmbyer dhe krime lufte”.
Ajo deklaroi se është e papranueshme që Gjermania po bën gjithçka mundet për t’i dhënë fund luftës, ndërkohë që një ish-kancelar i saj “shfaq këtë shkallë intimiteti” me Putinin.
“Në SPD-në e Palatinatit të Epërm, askush nuk e kupton më këtë”, tha ajo.
/dpa-argumentum.al
