Udhëheqësit e Bashkimit Evropian dhe të vendeve të Ballkanit Perëndimor do të mblidhen më 25 nëntor në Bruksel, për të diskutuar procesin e integrimit evropian, reformat dhe sfidat e përbashkëta të rajonit.
Sipas njoftimit zyrtar, BE-ja do të përfaqësohet nga presidenti i Këshillit Evropian, António Costa, dhe presidentja e Komisionit Evropian.
“E ardhmja e Ballkanit Perëndimor është në Bashkimin Evropian. Anëtarësimi i tyre është përparësia jonë, ambicia jonë e përbashkët dhe një investim thelbësor gjeopolitik në këto kohë të trazuara. BE-ja është dhe do të mbetet partneri më i besueshëm i rajonit”, deklaroi Costa.
Samiti synon të riafirmojë angazhimin e Bashkimit Evropian për anëtarësimin e vendeve të rajonit, duke u kërkuar njëkohësisht partnerëve të përshpejtojnë reformat dhe të përmbushin detyrimet që lidhen me procesin e integrimit.
Në diskutime do të përfshihet edhe integrimi gradual i Ballkanit Perëndimor në tregun dhe mekanizmat e Bashkimit Evropian, veçanërisht përmes Planit të Rritjes për Ballkanin Perëndimor, si dhe hapat e mëtejshëm për zbatimin e tij.
Një tjetër çështje e rëndësishme do të jetë forcimi i sigurisë dhe qëndrueshmërisë së rajonit, në një kontekst gjeopolitik gjithnjë e më kompleks.
Samiti zhvillohet në një moment kur perspektiva evropiane e Ballkanit Perëndimor mbetet një objektiv strategjik për BE-në, ndërsa përparimi drejt anëtarësimit varet nga zbatimi i reformave dhe përmbushja e kritereve nga secili vend.
© 2026 Argumentum
